Zanin dar 1:15-ah League Cup semifinal Chelsea vs Tottenham
Carabao Cup semfinal first leg chu zanin dar 1:15 hian Chelsea leh Tottenham ten Stamford Bridge-ah an khel dawn. Second leg hi January 12, Nilaini zan hian Tottenham Hotspur Stadium-ah khelh a ni ang.
League Cup semifinal hnuhnung zawkah Arsenal leh Liverpool te an inkhel dawn a, team pali chauh awm tawh mah se Premier League club ṭha pali an nih avangin nomawi chawi a harsa dawn.
League Cup a hlu
English club lian tan nomawi chawi theih pali Champions League, Premier League FA Cup leh League Cup a awm a, chung zingah chuan League Cup hi a hlu lo ber. Amaherawhchu club ṭhangduang an tam an ṭhahnem a, nomawi chawi a harsa a, League Cup chawi pawh hi hlawhtlinnaah a ngaih theih.
Spurs phei chuan kum 2008-a League Cup nomawi an chawi bak an la champion leh lo a, nomawi chawi thiam bik Jose Mourinho hnuaiah season liam ta khan final an lut. Portuguese manager hi an ban avangin final-ah a enkawl thei lo a, Spurs-in Manchester City an hneh lo.
Chelsea erawh manager thlak ngun mah se a khat mawi tawkin nomawi an chawi ve reng a, season liam ta pawh khan nomawi hlu bera ngaih Champions League nomawi an chawi. League Cup an champion hnuhnun ber pawh kum 2015 kha a ni a, Thomas Tuchel-a hoten tun season-ah chawi ngei an duh ang.
Conte vs Tuchel
Tottenham-in manager thar Antonio Conte hnuaiah hma an sawn hret hret a, Italian manager hi nomawi chawi kawnga mikhual lo tak a nih avangin Spurs hi Chelsea lakah dah hniam a thiang lo.
Conte hnuaiah Spurs-in 3-4-3 an hmang a, Chelsea pawhin 3-4-3 tho an hmang. En mai chuan formation inang niin ngaih theih mah se an khelh dan erawh a danglam hlak thung.
Italian manager hi chuan tlarhnung rem ṭhat a ngai pawimawh a, ball tel loa goal venhim pawi an ti lo. Chutihrualin counter attack-ah erawh an hlauhawm a, Spurs hian tlarhmaah Harry Kane leh Son Heung-min te an neih avangin goal khung turin chance tam an mamawh lo.
Tuchel-a hote erawh hi chuan ball an chang lo a nih pawhin chang let turin an khingpuite na takin pressure an pe ṭhin. Tlarhnunga defender pathum thlawp turin keeper Edouard Mendy leh midfielder Jorginho te an awm a, football hmuhnawm khel turin an ṭha tawk.
Semifinal chu...
Chelsea-in tun hnaiah chanchin duhawm lo an nei a, khelmual pawna Romelu Lukaku a ṭawng tam avangin Belgian striker hi Liverpool nen an inhnehtawk ṭumin squad-ah a awm lo.
Tunah erawh chanchin ṭha hriat tur a awm a, Lukaku hian Tuchel leh Chelsea board hnenah January transfer laia chhuah a duh loh thu a hrilh a, training pawh ṭha takin a zawm. Brazilian defender Thiago Silva pawhin season thara khel chhunzawm turin contract a pawtsei bawk.
League Cup semifinal-ah hian Chelsea-in African Cup of Nations khel tur Edouard Mendy an chhawr thei dawn lo a; Lukaku pawh a inlan a la beiseiawm lo zawk. Player pawimawh dang Reece James, Ben Chilwell, Andreas Christensen leh Timo Werner te pawh inhliam leh Covid-19 vangina khelh theih a rinawm lo. Mahse, Chelsea hian heng player ṭhate tel lo hian Liverpool lakah ṭha takin a la khel thei tho.
Tottenham pawhin Steven Bergwijn, Cristian Romero leh Ryan Sessegnon te an la chhawr thei dawn lo a, mahse kartawpa Watford an hneh hnuah inhliam thar an nei lo. Goal nawr turin Son leh Kane te an chhawr thei dawn lo a, Chelsea tlarhnung tan fimkhur a ṭul ang.
League Cup
Semifinal - First Leg
Zanin Inkhel Tur
Chelsea 1:15 AM Tottenham
January 6, Ningani zan
Arsenal 1:15 AM Liverpool
Semifinal - Second Leg
January 12, Nilaini zan
Tottenham 1:15 AM Chelsea
January 13, Ningani zan
Liverpool 1:15 AM Arsenal
Thlirna Tawi
Chelsea (Pld - 3; GF - 4, GA - 2)
Chelsea 1 - 1 Aston Villa
Penalty Shootout-ah Chelsea 4-3 in an chak
Chelsea 1 - 1 Southampton
Penalty Shootout-ah Chelsea 4-3 in an chak
Chelsea 2 - 0 Brentford
Tottenham (Pld - 3; GF - 5, GA - 3)
Wolves 2 - 2 Tottenham
Penalty Shootout-ah Tottenham 3-2 in an chak
Tottenham 1 - 0 Burnley
Tottenham 2 - 1 West Ham