Rangnick enkawl Man United-in Wolves an hneh lo
Manchester United-in Thawhṭanni zan khan Wolverhampton Wanderers an mikhual a, 1-0 in an hneh lo. Manager lailawk Ralf Rangnick hnuaia an chak lohna hmasa ber a ni a, Wolves tan erawh kum 1980 hnua Old Trafford-a hnehna an chan hmasak ber a ni.
Portuguese manager Bruno Lage leh a hoten hnehna an chan theih nan Portuguese midfielder Joao Moutinho-a'n minute 82-naah goal awmchhun a khung a, chance ṭha ngah zawk Wolves-in point thum hlawhchhuah an phu.
Jones a telna
Rangnick-a'n inhliam vanga kum hnih dawn khel tawh lo Phil Jones chu bul ṭantu zingah a tel a, English defender hi Raphael Varane nen bul an ṭan. United captain Harry Maguire a inhliam a, Victor Lindelof-a'n Covid-19 hri a kai bakah Eric Bailly-a'n African Cup a khelh dawn avangin Jones tan hun ṭha a inherhchhuah phah.
German manager hnuaiah United-in 4-2-2-2 formation an hmang a, midfield-ah Nemanja Matic leh Scott McTominay te inkawpin Mason Greenwood leh Jadon Sancho ten captain Cristiano Ronaldo leh Edinson Cavani te an thlawp. Rangnick-a'n team tan Cavani pawimawh thu a sawi a, Uruguayan forward hian tun season-a bul a ṭan vawi lina chauh a ni.
Wolves an thiam
Man United manager Rangnick aiin Wolves manager Lage-a'n khelh dan tur a duang ṭha zawk a, first half-ah mikhual team-in inkhel an thunun.
Wolves midfielder Daniel Podence leh Reuben Neves ten keeper David De Gea tan hna an siam ve ve a, Spanish keeper-a'n a hna a tlin. Cristiano Ronaldo-a'n an lama tauh let fuh tawk loh vangin Wolves-in chance an nei a, Raul Jimenez-a'n hnai tak aṭangin a tauh goal lo. Chutihrualin Mexican forward hi a offside hrim hrim bawk.
Man United erawhin Jose Sa tan first half-ah chance an siam ve lo. Wolves-in inkhel an thunun chhan hi Lage-a'n inkhelh banah a sawifiah. Portuguese manager chuan, "Man United player-ten pressure min rawn pe na dawn tih kan hria a, keini chuan pressure min pek vanga hmunruak lai chhut let dan tur kan duang thung. Team ṭha tak pawh hian ball an chan tam loh chuan an buai ṭhin," tiin an game plan a hlawhtlin thu a sawi.
Goal khat a tawk
Man United hi Rangnick hnuaiah an la vul tawk lo a, December thlaah pawh Norwich leh Crystal Palace te 1-0 in an hneh hram a, Newcastle nen 1-1 in an inhnehtawk bawk. Wolves an hmachhawn hma hian Burnley 3-1 in hneh mah se Lage-a hote lakah an goal bawh a na lo.
Second half-ah Man United an insiamṭha hret a, Bruno Fernandes-a'n Matic laka ball ṭha bik a hmuh chu crossbar pet per nan a hmang. Fernandes-a freekick pet chu Ronaldo-a'n a tauh goal zui a, mipui lawm hman mah se Ronaldo a offside - goal-ah pawm a ni lo.
Man United-in goal an beisei a, Ronaldo-a'n a chance ṭha neih chu goal zawnah a pet lo. Wolves lamin Man United tlarhnung an ti buai ve reng tho a, Romain Saiss-a'n freekick aṭangin crossbar a pet per.
Minute 82-naah substitute Adama Traore aṭanga ball cross chu Jones-a'n tauh chhuak ṭha tawk loin Moutinho-a'n box pawn aṭangin ṭha zetin a pet goal. Wolves chak nan goal khat a tawk lo a, chutihrualin keeper Sa puihna an mamawh. Injury time-ah Jones-a freekick hlawhchhuah chu Fernandes-a'n box pawn aṭang chiaha petin goal zawnah kal mah se keeper Sa-a'n a lo dansak.
Engtin zel?
Man United manager lailawk Rangnick chuan, "Mimal leh team angin kan khel ṭha lo. First half-ah kan talbuai avangin second half-ah centre back pathum kan hmang. Kan insiamṭha hret a, amaherawhchu insiamṭhat kan mamawh zia a lang," tiin a sawi.
German manager chuan sawi chhunzawmin, "Mual laiah player an dah hnem avangin inkhel thunun kan harsat. Goal kan chhuah dan thlirlet khan awmna tur kan awm tawk lo. Adama Traore cross theihna hmun kan siam a, Moutinho pawhin ball a pet thei tih kan hre chungin hun thawl kan pe bawk," tiin inkhelh dan a sawi.
Man United hian match zawnin Steven Gerrard-a enkawl Aston Villa an hmachhawn dawn. January 10, Thawhṭanni zanah Villa nen hian Old Trafford-ah FA Cup an khel ang a, January 15, Inrinni zanah Villa nen bawk league match an khel leh ang.