PSG chakna Kylian Mbappe

Kylian Mbappe-a hattrick hmangin Paris St-Germain chuan Vannes 4-0 in an hneh a, harsa lo takin French Cup last 16 an in pet kai. Inkhel dangah Marseille chuan Chauvigny chu 3-0 in an hneh, zan hmasa lamah AS Monaco an tlang fel tawh bawk.

Thawhṭanni zan Stade de la Rabine-a inkhelah PSG hian hri leng kai vangin Lionel Messi an chhawr thei lo a, goal khung kawngah erawh harsatna an nei lem lo. An khingpui fourth division club lakah hian harsatna lian tham an tawk lo.

Goal 150
Chak tura rinkai zawk ni chungin PSG hi khualmualah an lenglut a, chawlhlawk hmain defender Presnel Kimpembe-a tauh luh bak erawh goal an khung thei bik lo. Second half-ah erawh Vannes tan Mbappe chu dan theih a ni tawh lo.

France international hian Kimpembe siamsak a khung ṭan a. Xavi Simons-a ball pek chu yard 20 zet a hla aṭanga a khung hnuah pawh a la duhtawk mai lo. Junior Dina Ebimbe nen an in one-two hnuah hattrick a siam zui.

Kum 23 mi Mbappe hian PSG tan match 196 a khelh aṭangin goal 150 a khung tling ta. A contract neih lai hi tun season tawp ruala zo tur a ni a, a chhuak dawn a nih pawhin Paris club tan season chawhnu lamah goal a la khung belh nual ang.

PSG hian tun hnai kum sarih chhung chu French Cup hi vawi ruk ngawt an chawi, kum 2015 aṭang khan final an la lut ziah - kuminah pawh hian an chesual viau a nih ngawt loh chuan champion tura rinkai ber an ni leh dawn.

Poch a lungawi
Messi leh Neymar bakah player dang pathum chhawr thei lo mah se PSG an la ṭha tawk a, coach Mauricio Pochettino chuan, "Inkhelh hmaa kan thil tum chu round sang zawk thlen a ni a, kan tih hlawhtlin theih avangin ka lawm.

"Thlasik chawlh kan hma hnua kan match hmasa ber a nih avangin thil kha sawilawk a harsa, khelmual chhunga ka naute khelh dan erawhin min tilawm hle," a ti a, club tana goal 150 khungtu Mbappe a lawmpui thu a sawi bawk.

Tun season tawp ruala contract hmang zo tur Mbappe chuan, "Club lian tana goal khung hnem hi a ropui ka ti a, tuna goal 150 ka khung ve ta mai pawh hi ka lawm. Mellung pawimawh phun thei tur hian player ṭha tak tak ka khelhpui avangin ka vannei hle," a ti.

Mbappe hian a hma lam hun a la ti chiang thei lo. PSG chuan inremna ziahpui ngei an duh, mahse a naupan lai aṭanga khelh a châkna Real Madrid hipna a na, Paris club tan Mbappe chelh tur chuan sum mai ni loin dinhmun ṭha leh duhawm zawk pek tel a ngaiin a rinawm.