Ranji Trophy a kaltlang ang - Ganguly

Board of Control for Cricket in India (BCCI) president Sourav Ganguly chuan, ram chhungah hripui leng hluar leh mek mah se state leh state inelna Ranji Trophy chu kaltlangpui a nih tur thu a sawi chiang.

India ramah Covid-19 a hluar leh mek a, hei hian infiamna pawh a nghawng leh ngei dawn niin a lang. Mahse, season hmasa lama an lo kalpui tawh angin Ranji Trophy chu inkhungbingna hnuaiah khelh a ni dawn.

Ganguly chuan, "Ruahman lawk dan angin kan kal ang. Tun dinhmunah chuan player leh sumdawnna lam kan thawhpui ten hri vangin harsatna lian tham an tawk lo niah kan ngai, chuvangin tournament khelh ngei kan tum.

"Tun hma angin duh leh beisei angin thil a kal thei lo tih chu hriatsa a ni. Amaherawhchu, hun harsa kan tawh lai pawh hian kan theih leh phak ang tawk tawkin inelna kan neih hi a pawimawh," tiin a sawi.

BCCI ruahman dan chuan January 13 aṭangin hmun hrang hrang pangaah Ranji Trophy hi khelh a ni dawn. Cricket Association of Mizoram pawhin team a tir leh dawn a, inbuatsaihna ngawrh takin an nei mek.

Mizoram hi plate group-ah an awm, an match hmasa ber atan January 13 hian Chandigarh an hmachhawn ang. Chumi hnuah Nagaland, Sikkim, Arunachal Pradesh leh Meghalaya te an hmachhawn leh ang.