Lyon-in league tihtawp an pawi ti

Lyon president Jean-Michel Aulas chuan hma taka French Ligue 1 an titawp mai kha pawi a ti hle a, thutlukna dik lo tak niin a sawisel zui bawk. Lyon hian hun rei tak hnuah European football an khel dawn lo.

Coronavirus vangin football season kal lai a khaihlak nasa hle, March 13 aṭang khan Ligue 1 pawh chawlh lailawk a ni. French Football Federation chuan April thla khan an rama league sang bakah a hnuaia awm dangte pawh a titawp.

Champion lai leh fal taka hmahruai mektu Paris St-Germain chu nomawi hlan an ni a, table mawngpaha awm pahnih Toulouse leh Amiens te chu Ligue 2 lamah tlak thlak tir an ni thung. European league lian dang German Bundesliga, Spanish La Liga, Italian Serie A leh English Premier League te chu hripui leng vang hian chawl lailawk ve bawk mah se tun hnaiah khelh chhunzawm leh theih vek a ni.

Aulas chuan, "Khatih hun laia kan mamawh chu tih tawp lailawk mai kha a ni a, a hnu lam kalphung tur kha chu hmanhmawh a ngai lem lo. League tih tawp kha chu thutlukna siam sual lian tak a niah ka ngai. Tunah chuan football en turin keini chuan ram dang kan hawi a ngai. French Football Federation hian sum kan hlohte hi min pe let se tih hi ka duh hial," tiin a sawi.

Ligue 1 ti tawp mah se Lyon tan hian season a la zo ngawt lo. PSG nen French League Cup final khelh tur an la neih bakah, inelna lian Champions League last 16-ah an la dam. First leg-ah Juventus 1-0 in an hneh a, quarterfinal lut turin beiseina an la nei. 

Lyon president chuan sawi zawmin, "August thla hian UCL kan khel chhunzawm dawn, kan elpui team dang chuan keini aiin inbuatsaihna an nei ṭha viau dawn tih chu thil chiangsa a ni. League lian dang chuan match pawimawh an khel mawlh mawlh reng," tiin chawl reng lo a, match khelh a pawimawh thu a sawi bawk. League tih tawp chungchanga lungawi lo club ṭhenkhat chu court lamah an zualko a, mahse thutlukna siam tawh hi tihdanglam tumna a awm lem lo.