Hnehna nen Osaka a lo kir

Naomi Osaka chu thla li chhung zet tennis court-a a inlan loh hnuah a lo kir ve leh ta. Japanese star hi nimin khan Melbourne Summer Set event-ah a inlan a, a khingpui Alize Cornet chu 6-4, 3-6, 6-3 in a hneh hram.

Australian Open champion lai Osaka hian season hmasa khan rilru lam harsatna a tawk a, inkhelh a harsat avangin tournament pawh a khel tam lo. World number 1 pawh ni zak zak tawh hi tunah chuan number 13-ah a tla hniam hial.

September thlaa khelh zawh US Open hnuah tun ṭum hi a inkhelh lehna hmasa ber a ni a, player langsar tak ni lo lakah hian unforced errors vawi 57 zet a nei a, heng zingah hian double faults pawh vawi riat a tel.

A tihsual avangin a khingpuiin point a hmuh hi a tam hle. Australian Open nomawi a kawl lai humhim tur chuan insiamṭhat a mamawh dawn hle tih a chiang a, chutih rualin huaisen taka a inkhelh leh theih tak avangin lawmna tur a awm.

Kum 24 mi Osaka chuan, "Ka tan chuan Melbourne khawpui hi a nuam. New York khawpui ka ngainain ka hmangaih a, chutih rualin Australian Open hi Grand Slam pali zinga khelh nuam ka tih ber a ni hial ang.

"Beiseina sang tak nen Australian Open khelh leh ka tum a, inbuatsaihna hun ka neih ang angah hian a ṭha thei ang bera tih ka tum," a ti. Vawiin hian German nula Maryna Zanevska nen an inhmachhawn leh nghal dawn a ni.

Melbourne khawpuia inelna neihah hian Nick Kyrgios chu mipa huanga inlan tur a ni bawk. Mahse, tualchhung tlangval hi thawhah (asthma) vangin a inkhel thei lo - Australian Open atan pawh a dinhmun a chiang lo.

Kum 26 mi Kyrgios hian nikum khan match 15 chiah a khel a, vawi sarih hnehna a chang. Nikum September thla hnu lamah a khup na vangin a la inlan leh lo a, world ranking-ah pawh 93-na niin a tla hniam tawh hle.