Hripuiin Bayern a bawh buai zel

Bayern Munich defender Lucas Hernandez leh Tanguy Nianzou te chuan Covid-19 an kai tih hmuhchhuah a ni a, natna lang chhuak nei rih lo mah se midang tlawh pawh loh tura khung hran nghal an ni.

German champion player zingah hripui kai an tam ta hle. Kar hmasa tawp lamah khan captain Manuel Neuer, Kingsley Coman, Corentin Tolisso leh Omar Richards te chu hri lak aṭang hian an fihlim ve chauh bawk.

Bayern chuan thuchhuah siamin, "FC Bayern player pahnihin hripui an kai, hri kaite hi Lucas Hernandez leh Tanguy Nianzou te an ni. Leroy Sane, Josip Stanisic leh Dayot Upamecano te chu an la negative lo bawk," an ti.

Nikum tawp lamah khan Joshua Kimmich chuan hri hi a lo kai tawh bawk. German international hi invenna la duh lo zinga mi a ni a, hri hian a taksaah nghawng a neih hman avangin vaccine a la lo chu a inchhir thu a hnuah a sawi chhuak.

Bundesliga hian thlasik chawlh an hmang mek. League match 17 an khelh tawh chinah Bayern hian point kuain hma an hruai fel mek. Season chawhnu lam atan an match hmasa ber turin Zirtawpni zanah Borussia Moenchengladbach an mikhual ang.