A vawi 12 nan Nets an chak lo

Kevin Durant leh James Harden te meuh nei mah se Brooklyn Nets tan chak reng theih a ni bik lo. Nimin zing NBA regular season inkhelah Nets hi Memphis Grizzlies lakah 118-104 in an chak lo.

Grizzlies tan Ja Morant-a'n point 36 a nei a, player dang - Desmond Bane (29 points) leh Brandon Clarke (16) te bakah Jarrett Culver leh Tyus Jones ten point 12 ve ve an nei a, an khelh ṭhat rual avangin team ṭha an hneh thei.

Morant chuan, "Kan squad-ah hian player ṭha tak tak an tam, media leh mipui lamin an ngaihven tawk lo a ni mai thei. Mahse, tunah chuan kan thil tih avangin sawi lan loh theih loh dinhmunah kan ding taah ka ngai," tiin a sawi.

Western Conference table-ah Grizzlies hi palina an ni mek a, vawi 24 hnehna an chang tawh. An chungah hian Golden State Warriors, Phoenix Suns leh Utah Jazz te chauh an awm.

Nets pawh chak lo mah se Eastern Conference lamah chuan pahnihna an la ni tho. Vawi 23 an chak tawh a, chutih rualin ṭum 12 an tlawm tawh, table hmahruaitu ni tur chuan chak loh tlem zual an mamawh.

Nimin zing inkhel dangah Golden State Warriors chuan Miami Heat 115-108 in an hneh a, season kal laia vawi 29 an chakna niin anni aia chak hnem an awm lo. Ningani zingah Dallas Marvericks an hmachhawn leh ang.

Golden State player pawimawh Draymond Green chuan, "Player kan inlungrualin thawhhona a ṭha em em a, ni tin mai hian inkhelh kan châk zek zek reng mai a ni. Hetiang ang squad neih chuan tu pawhin inkhelh an châk ang," tiin a sawi.

Season hmasa khan GSW hian beisei an phak lo hle, table mawngphah lam luahtu an ni. Kuminah erawh season duhawm an hmang leh mek a, champion tura rinkai zingah an tel.

NBA - Nimin Results
Houston Rockets 113 - 133 Philadelphia 76ers
Detroit Pistons 115 - 106 Milwaukee Bucks
Atlanta Hawks 131 - 136 Portland Trail Blazers
Charlotte Hornets 121 - 124 Washington Wizards
Utah Jazz 115 - 104 New Orleans Pelicans
Minnesota Timberwolves 122 - 104 Los Angeles Clippers
Memphis Grizzlies 118 - 104 Brooklyn Nets
Denver Nuggets 89 - 103 Dallas Mavericks
Orlando Magic 98 - 102 Chicago Bulls
Miami Heat 108 - 115 Golden State Warriors