Australian Open khelh beisei Tsitsipas

Mipa tennis world number 4 Stefanos Tsitsipas chuan tun hnaiah natna neuh neuh a nei nual. Mahse, January 17 aṭanga khelh tur Australian Open tan chuan 100% a dam hman ngei a beisei thu a sawi.

Greek tlangval hi an ram tan Davis Cup-ah a inlan a, a match hmasaah Argentine tlangval Diego Schwartzman chu 6-7 (5-7), 6-3, 6-3 in a ngam lo, doubles match lamah inlan zui lehin hetah chuan hnehna an chang ve thung.

Kum 23 mi Tsitsipas hi nikum khan a kiu (elbow) zai a ni a, zai a nih hnuah tun ṭum hi singles match pangngai a khelh lehna hmasa ber a ni. Tsitsipas chuan, "Banrek leh kiu velin rilru a luah a, inkhela rilru pek vek a harsa.

"Tun hmain hetiang hliam hi ka la nei ngai lo, chuvangin a dawnsawn dan ka thiam tawk lo pawh a ni mai thei. Australian Open khelh hunah chuan dam vara inlan theih ka inring, chumi tur chuan hun pawh a tam tawkah ka ngai," a ti.