Jerry Mawia a mawi leh ta

Indian Super League-ah Jerry Mawihmingthanga'n Mizo hming a timawi leh ta a, Mizo tlangval hian Thawhṭanni zan khan goal hnih a khung bakah assist vawi khat a nei - hero of the match atan an thlang.

Odisha FC hian 4-2 in Mumbai City an hneh a, Aridai Cabrera leh Jonathas de Jesus te chuan Odisha tan goal an khung bawk - Mumbai tana Ahmed Jahouh leh Igor Angulo te goal khung chu scoreline chei mawina mai a ni.

Kalinga Warriors (Odisha sawina) hi table-ah pasarihna ni mah se hmahruaitu Mumbai City nena an inthlauhna chu point ruk chauh a ni a, Jerry leh a ṭhiante tan top four-a season khar turin beisei a la awm.

Inkhel chu
Odisha tan Las Palmas winger hlui Aridai Cabrera chuan minute lina lekah goal hmahruai a khung nghal a, mahse, NorthEast United nena 3-3 a inhnehtawk hlim Mumbai-in tlawm an duh lo.

Morocco international hlui Ahmed Jahouh chuan minute 11-na lekah si phurh a rawn sut nghal a, Athletic Bilbao forward hlui Igor Angulo chuan minute 38-naah a belhchhah leh bawk.

Hma taka hmahruaitu Odisha zawk an hnufual lehnghal a, goal dang lut loin chawlhlawk hman a ni - Mumbai tan Lalengmawia chuan inkhel bul a ṭan a, Vaivakawn rawlthar hi a khel ṭha hle.

A changtupa Jerry
Mahse, a hunah tak a changtupa a che ṭhin a, Odisha tan pawh a hunah tak Jerry a lo lang. Chanmari tlangval hian minute 70-naah Nandhakumar-a siamsak chu a tauh goal a, 2-2 a ni.

Jerry-a'n a la duhtawk lo cheu - minute sarih hnuah Jonathas-a siamsak chu goal-ah chiang takin a chhuih lut a, player ṭha bik ke aṭanga chhuak goal a ni - Igor Stimac i lo en maw?

Odisha-in chak ngei an duh a, Jerry pawhin a duh. Jonathas tan duhthusama ṭhain a siamsak a, Real Sociedad forward hlui hian harsatna nei loin goal-ah a chantir a, 4-2 in an chak.

Pathian vang
Jerry-a'n tun season ISL-ah a vawi khat nan goal a khung a, "Pathian vang a ni - amah vang chauh a ni. Theihtawp ka chhuah a, anin mal min sawm a ni," tiin a goal khung chu Pathian vang a nih thu Vanglaini a hrilh.

Chanmari tlangval chuan, "Mimal hmingṭhatna hi ka khelh chhan a ni lo a, team tana hlawhtlin hi ka duh ber chu a ni. Ka goal khung tur zat leh assist tur zat ka ngaihtuah ngai lo a, a ṭha thei ang bera khelh a, ka team puih hi ka duh chu a ni mai," a ti a, mimal aiin team a ngaihlu.

Jerry chuan, "Ṭawngṭaipuina ka dawng nasa a, chutiang vang chuan tun dinhmun hi ka thleng a, result kan nei ṭha a ni," tiin Vanglaini a hrilh a, champion chungchang sawi zuiin, "Team kan intiat tawk a, inhneh thei vek kan ni. Kan thawhhona a ṭhat zel chuan kan champion thei ang," a ti.

Mizo tan
Odisha-in Mizoram player pariat ngawt an kawl a, Mumbai an hmachhawn zanah Jerry bakah Isaac Vanmalsawma chuan bul a ṭan a, bench aṭangin Lalruatthara, Paul Ramfangzauva leh Daniel Lalhlimpuia te an lut bawk.

Jerry chuan, "ISL club pakhatah hetiang zata tam Mizo player an awm ngai lo a, Odisha hian Mizo min duhsak hle. Chutiang a nih rual chuan kan hnam aiawhtu kan ni a, kawng engkima fimkhur turin Mizo player-te pawh kan infuih tawn reng.

"Kan hmingṭhat chuan Mizo hming a ṭha tih kan hria a, kan chetsual pawhin chutiang chiah chu a ni. Chuvangin kan fimkhur a, kan hnam tihmingṭhatu nih hi kan duh ber chu a ni," tiin Vanglaini a hrilh.