Hrgovic-a'n Ortiz a cho

Kum thar nia round rukna leka technical knockout hmanga Charles Martin hnehtu Luis Ortiz-a'n chotu a nei nghal a, Croatian boxer Filip Hrgovic chuan kum 42 mi boxer hi Oleksandr Usyk hmachhawn tur zawng tura inhnekpuiah a cho.

Hrgovic-a promoter Kalle Sauerland chuan, "Ortiz hian belt beisei a tum a nih chuan Hrgovic a hmachhawn phawt a ṭul ang," a ti a, Hrgovic chuan, "Ka hnekah Ortiz hi chu a khawng vek mai ang," tiin a sawi bawk!

Boxer pahnihin hmachhawn an beisei Usyk hian IBF, WBA leh WBO heavyweight title a kawl mek a, mahse, Anthony Joshua nen rematch nei turin a inpuahchah mek.

Hetihlai hian Usyk-a kawnghren kawl zinga mi IBF title hi Ortiz leh Hrgovic te hian an beisei ve ve a, Sauerland chuan, "IBF hian lehkha tichhuak se la, Ortiz-a team-te kan dawr nghal ang," tiin a sawi.

Ortiz hian WBC title fight vawi hnih a lo nei tawh a, mahse, Cuban boxer hi Deontay Wilder lakah a tlawm ve ve - vawi 37 fight a neiha a tlawm awmchhun an ni a, vawi 33 chakin vawi hnih dang erawh 'no contest' ah puan a ni thung.

Kum 29 mi Hrgovic hian vawi 14 fight a hmachhawn tawhah vawi 14 hnehna a chang tawh a, vawi 12 chu a khingpui a knockout - WBC International title leh IBF International title a kawl mek.

Ortiz-a'n Martin a hneh hma khan IBF chuan Martin hi an ranking-ah number 1-ah dahin, Hrgovic hi number 2 a ni thung a, mahse, Ortiz-a'n Martin a hneh hnuah number 1 an awm rih lo.