Barca-in Torres an tlangzarh; Chelsea-ah Silva

Lei ba ngah vanga talbuai Barcelona-in transfer bazar-ah insum an tum phah lo a, Spain forward Ferran Torres chu Manchester City aṭanga an lei hnuin fans hmaah an tlangzarh ta.

Kum 21 mi forward hian pound maktaduai 46.3-in Barca hi a pan a, June 2027 thleng cham turin contract a ziak - a lei chhuak duh an awm a nih chuan pound maktaduai 842 insen an huam a ngai dawn thung!

Hetihlai hian Chelsea defender pawimawh Thiago Silva chuan Stamford Bridge-ah kum khat dang cham turin contract thar a ziah belh leh ta a, Blues tan chanchin lawmawm a tling.

He thu buatsaih a nih lai hian Manchester United defender Axel Tuanzebe chu Napoli-ah loan-in a kal dawn nia sawi a ni bawk a, thlasik transfer a ngaihnawm zel dawn.

Kan lo kir e!
Valencia aṭanga City pantu Torres-a'n English club tan thla 18 chiah a khel hman a, match 43-ah goal 16 a khungsak a, assist vawi li a nei - Barca-ah hming chher theih a beisei ang.

Barcelona president Joan Laporta chuan, "Barca kan lo kir leh ta a, lo inring vek rawh u. Mite tan entawn tur kan hnutchhiah ṭhin a, vawiin niah hian Ferran hmangin kan nihna kan pholang leh ta.

"Chi ai hauh loin hna kan thawk a, thlasik transfer-ah player dang kan la lakluh belh dawn a ni," a ti a, result nei ṭha rih lo mah se a pawr hle!

Catalan club hian Torres hi an la ziak lut thei rih lo thung a, November-a an lakluh tawh full back Dani Alves pawh an la ziak lut thei lo - player an chhuah ṭhentir phawt a ngai dawn.

Silva a rinawm
Kum 37 mi ni tawh mah se Thiago Silva a la rintlak reng a, chumi hrechiangtu chu Chelsea fan-te an ni - Brazilian defender hi Stamford Bridge-ah kum khat dang a cham leh dawn.

Silva hian August 2020 khan Paris St-Germain aṭangin Blues hi free transfer-in a zawm a, a season hmasa berah Champions League nomawi a chawipui a, European champion an nih theih nan player pawimawh a ni.

Brazil tana vawi 100 inlan tawh Silva chuan, "He club ropui takah hian kum thum ka khel tling ang tih reng ka lo ngaihtuah ngai lo a, season khat ka cham leh tur hi ka lawm hle. Chelsea tana khelh hi a nuam a, khawvela league pawimawh bera a ṭha thei ang bera khel turin theihtawp ka chhuah zel ang," a ti.

AC Milan defender hlui hian Chelsea a pan hnuah inelna hrang hrangah match 56 a khelhsak a, goal li a khung tawh. Tun season-ah pawh inelna hrang hrangah match 22 a khel tling leh der tawh a ni.

Hello Pepi
American rawlthar duhawm Ricardo Pepi chuan Major League Soccer club FC Dallas aṭangin FC Augsburg a zawm a, Bundesliga club hian a man atan dollar maktaduai 20 an pek bakah a khelh ṭhat dan a zirin an la pek belh leh ang.

FC Dallas aṭanga inzir chhuak forward hi MLS chanchinah khawtual club chherchhuah player man to ber a ni a, Augsburg hian an hralh a nih chuan Dallas hian a hlawkna 10% an la chang leh dawn bawk.

Kum 18 mi Pepi hian tun season-ah MLS match 31 khelin goal 13 a khung a, assist vawi hnih a nei bawk. MLS All Star-a a lan bakah MLS Young Player of the Year atan thlan a ni a, USA tan match sarihah goal thum a khung tawh.

Pepi chuan, "MLS season zawh ruala Europe-a kal hi ka duhthusam chu a ni," a ti a, a kum a la tlem avangin a chungah beiseina a sang khawp ang.

Transfer dang
United defender Tuanzebe chuan Napoli a zawm dawn a, season tawp thleng loan-in a khel dawn - he thuziak i chhiar meuh chuan Italian club hi a zawm tawh hial ang.

Red Devils academy chhuak defender hian United tan match 37 a khel ve tawh a, season hmasa kha a khelh tam ber season niin match 19 a khel - tun season ṭan dawn khan a vawi thum nan Aston Villa chu loan-in a zawm a, inelna hrang hrangah match 11 a khel hman.

Championship-a Villa an awm lai pawha vawi hnih ngawt loan-a lo zawm tawhtu hi Villa boss Steven Gerrard hnuaiah hmun a chang meuh a, United hian ko kirin Italy lamah an kaltir.

Hetihlai hian French player beiseiawm Michael Cuisance chuan Bayern Munich chhuahsanin Venezia a zawm a, German club tana match 13 kheltu hian 2025 thleng Serie A club-a cham turin contract a ziak a, a man atan euro maktaduai li bawr vel an seng nia sawi a ni.