Hofmann-a'n Gladbach beiseina a siam

Bundesliga-ah champion a hriat tawh a, Bayern Munich leh Borussia Dortmund te Champions League khel turin an tling tawh. Amaherawhchu Europe-a inelna sang ber khel turin hmun ruak pahnih a la awl a; RB Leipzig, Borussia Monchengladbach leh Bayer Leverkusen ten an inchuh mek. 

Thawhlehni zan khan Borussia M'gladbach-in Wolfsburg 3-0 in an sawp a, Jonas Hofmann-a'n goal hnih khungin Lars Stindl-a'n goal khat a khung ve bawk. Nizan khan Leipzig leh Leverkusen te a inlan a, result kan hre hman lo.

Gladbach-in an mual Borussia Park-ah harsatna a tawk lo a, goal pawh an khung hma. Minute 10-na lekah Breel Embolo thawhrah sengin Hoffman-a goal hmahruai a khung a, Wolfsburg tlarhnung an ṭhiat nalh hle. 

Minute 30-naah Matthias Ginter-a'n Hoffman tan a siamsak a, German midfielder hian goal hmasa ber a khung ang thoin a hunah tak a tlan lut a, Lars Stindl hmangin goal thumna an khung ta tho. Kum 27 mi Hoffmann hian hattrick siam theihna hun ṭha a hlah a, amaherawhchu Gladbach hian goal thum khung tur hian passing mawi tak hmangin Wolsburg tlarhnung an ṭhiat vek a, team ṭha zawk an nihzia a pholang.

Gladbach hian Paderborn leh Hertha Berlin an hla hmachhawn dawn a, an hneh ve ve a nih pawhin Champions League khel tur chuan Leipzig leh Leverkusen te result-ah an innghat. Inkhel dangah Freiburg-in Hertha BSC 2 - 1 in an hneh a, Union Berlin-in Paderborn 1 - 0 in an hneh bawk.