Djokovic-a'n Australian Open khel dawn

World number 1 Novak Djokovic chuan Covid-19 danna la duh lo mah se Australian Open a khel thei dawn a, expert independent panel chuan Serbian star hi a inkhelh theih nan a chungah zahngaihna an lantir a ni.

Australian Open hi January 17-ah khelh ṭan a ni dawn a, Melbourne Khawpuia neih tur inelnaah hian Djokovic hi vawi kua ngawt a champion tawh.

Kum 34 mi tennis star chuan, "Ka chhungte nen chawlh chhungin hun hlimawm tak kan hmang a, tunah chuan thuneitute hriatthiamna nen inelna hmachhawn turin ka kal dawn," a ti.

Tennis Australia chuan, ""Novak Djokovic-a'n Australian Open a khel dawn a, Australia a rawn pan mek a ni," tiin thuchhuah an siam ve bawk - dan ang chuan inelnaa tel tur player leh staff te chu hri danna an la ngei tur a ni a, an la lo a nih chuan expert independent panel-in an ngaihhnathiamna lehkha an neih a ngai a ni.