Etihad Stadium-ah champion Liverpool

Premier League champion an nih hnua a vawi khat nan Liverpool chu zanin dar 12:45 hian an inlan dawn a, season ṭantira champion tura an elpui Manchester City chu khualmualah an lenchilh ang. 

Manchester City boss Pep Guardiola chuan league champion a nihna angin Liverpool chu zahna nen an lo hmuah tur thu a sawi a, an elpui team hi 'guard of honour' an lo pe dawn. Chelsea-in City hneh lo se chuan zanin hi Liverpool tan champion nemnghehna tur inkhel a ni a, mahse Chelsea-in an hahdamna tura hna an lo thawhsak avangin zaninah thlamuang zawkin an khel thei ang.

Hriat tel tur erawh Premier League club lian pahnih, khawvela coach langsar pahnih kaihhruai, star rual khelhna team an ni a, Liverpool champion tawh vang maiin an inthlahdah dawn lo.

Liverpool lamah chuan champion boruak bak sawi tur an la nei meuh lo a, an training ground pawh hlim nui riin a la luah hneh rih hle. 

Hetiang boruak karah hian Liverpool champion sawi nep tum an awm a, Premier League chu tun hma anga inelna a hautak tawk loh thu an sawi - Liverpool san fal vang a ni. He titi lengvak hi Jurgen Klopp-a'n pawm nuam a tih chi a ni ve lo. German coach chuan, "Premier League hi a awlsamah an ngai a nih chuan City, Chelsea,  Leicester City, Burnley, Norwich, Southampton leh team dang tupawh hi hmachhawn ve chhin rawh se," a ti! Klopp-a'n an champion tak vanga Premier League sawi nepna pai dam harsa a ti a, an thiam reng vanga champion an nihzia pholang turin an theihna tawp nen a team te a khelhtir ang. 

Reds defender Joel Matip chu season tluanin a inkhel thei dawn lo tih chiang tawh mah se Adam Lallana, James Milner leh Xherdan Shaqiri ten training an zawm leh tawh a, Liverpool tan chanchin ṭha a ni. 

European champion lai hian Premier League khelh zawh hnuah inelna hmachhawn tur an nei tawh lo a, Klopp-a'n hei hi hre ran chungin champion mah se season tawp thlenga tha thlah loa an khelh tur thu a sawi. 

Champion tih a chian hnu lawka tlawm hi Liverpool duh dan a ni dawn lo a, Klopp-a'n an ṭhat dan berin team a rawn din a rinawm - Mohamed Salah, Roberto Firmino leh Sadio Mane te inkawp kan hmu leh dawn tihna a ni. 

Premier League-a team pahnih an intawn hnuhnung 10-ah City hi vawi hnih chiah an la chak ve a, Champions League-ah heti chhung hian Reds hian vawi hnih an hneh bawk - Liverpool-in chak leh an tum ang. 

Manchester City boss Pep Guardiola-a'n Premier League-ah Liverpool an champion dawn tih a chian khan an rilru chu inelna dangah an dah thu a sawi a, fixture hautak karah zaninah players engemaw zat a awl a rinawm. 

Pathianni zan khan Pep hian a thusawi nemngheh nan FA Cup quarterfinal-ah Kevin De Bruyne, Raheem Sterling, Aymeric Laporte, David Silva, Gabriel Jesus leh Riyad Mahrez te inkhel bul a ṭantir a, Newcastle United hnehin semifinal an lut. 

Pep-a'n beisei tur awm tawh lohna Premier League-a risk lak ai chuan Champions League leh FA Cup a mitthla ang a, Magpies laka bul ṭantute hi an inhliam loh nan bench-ah a dah a nih pawhin a mak lo ang. Fernandinho chu hrem vangin a inlan thei dawn lo a, Sergio Aguero-a inhliam mek bawk. Hetihrual hian Ederson, Rodri, Bernardo Silva leh Phil Foden ten bul an ṭan a rinawm a, 'second team' tia sawi ngawt a rem lo - Pep-a'n nomawi an hlohna Liverpool laka tlawm a duh dawn lo.