Police tan phuba lakna remchang ; Zanin dar 7-ah Chhinga Veng Vs Police
Mizoram Police-in MFA Super Cup semifinal-ah Chinga Veng an hneh lo a, LG Independence Cup-ah phuba lakna remchang a inher chhuak. Zanin dar 7:00 hian Lammualah tualchhung club ṭha pahnihte hi an inhmachhawn ang.
Tu nge ṭha zawk?
Chhinga Veng coach Lalsangzuala Hmar chuan, "Team ṭha zawk kan awm lo a, a vannei zawk kan chak ang," tiin Vanglaini a hrilh.
Season liam ta khan Chhinga Vengin nomawi chawi theih zawng zawng an chawi a, team ṭha ber an ni. Tun season-ah erawh Chhingcows-in player ṭha an chân nual a, team ṭha ber ni tawh lo mah se MFA Super Cup-ah an champion.
Champion tur hian semifinal-ah Police chu goal hniha an hnufual hnuah an lehthal a, Lalsangzuala Hmar hote hi second half-a player 10-a an khelh avangin an hnehna chan hi a ropui hle.
Amaherawhchu, Chhingcows hian hnehna chang turin extra time an mamawh a, an chak dan leh an player neih thlirin an ṭha zawk bik lo. Coach Sanga thusawiin a nemnghet a, zanin inkhel turte hi an intluk tawk.
Phuba lak hun
Mizoram Police-in match hnih an khelh tawh avangin point ruk an hmu tawh a, Chhinga Vengin match khat chiah an la khelh avangin an inthlauhna hi point thum a ni.
Police tan defensive game khelh a rem a, counter attack hmanga nawr lêt turin tlan chak vanga lar Lalsangbera leh Lalbiakhlua te an nei a, ball pe turin R. Malsawmtluanga te an awm bawk.
Goal venghim turin keeper ṭha Lalmuanawma bakah defender ṭha Lalhmunmawia (Ahmuntea) te an nei bawk a, midfield-ah match hnuhnung bera man of the match V. Lalṭanpuia leh Lalbiaktluanga ten tlarhnung an puih theih bawk avangin an squad a chhah ṭha a, phuba lakna remchang tihin a sawi theih.
A hmuhnawm dawn
Chhinga Veng coach Sanga chuan, "Police dinhmun a ṭha tih kan hria a, chuvangin kan training hnuhnung berah attacking chu kan zir nasat ber a ni. Kan attack dawn kan tih hian goal venhim kan ngaihthah dawn tihna erawh a ni lo," tiin chak tuma an khelh tur thu a sawi.
Group B-ah Police leh Chhinga Veng hi semifinal tur tura rinkai an ni a, chuvangin zanin inkhel hi group hmahruaitu inchuhna tiin a sawi theih bawk.
Mahse, MPL kaithar Chawnpui FC-in state pawn team Jamshedpur FC an hneh a, Chhingcows hi an chak lo a nih chuan rilru nuam taka awm a rem lo ang.
Group B
Results & Fixtures
28 July, Inrinni
Mizoram Police FC 2–1 Chawnpui FC
MPFC : Lalbiakhlua 61'; Lalfakzuala 62'
CHFC : Vanlalnghenga 7'
MoM: Lalbiakhlua, MPFC
Chhinga Veng FC 2-0 Kanan FC
CVFC : Vanlalzuidika 13'; Lalromawia 73'
MoM : Lalromawia, CVFC
1 August, Nilaini
Kanan FC 1-2 Mizoram Police
KFC : Lalhriatpuia 90+2'
MPFC : R. Malsawmtluanga 37'; V. Laltanpuia 70;
MoM : V. Lallaltanpuia, MPFC
Chawnpui FC 2-1 Jamshedpur FC
CHFC : Subham Ghosh 54' (OG); Lalramliana 76'
JFC : Billu Telli 35'
3 August, Zirtawpni
2:00 PM Jamshedpur Vs Kanan FC
7:00 PM Mizoram Police Vs Chhinga Veng
6 August, Thawhṭanni
2:00 PM Chhinga Veng Vs Jamshedpur
7:00 PM Kanan FC Vs Chawnpui FC
August 8, Nilaini
2:00 PM Chawnpui FC Vs Chhinga Veng
7:00 PM Jamshedpur Vs Mizoram Police