Chawnpui an par chhuak ta

LG Independence Cup-a state pawn team awm chhun Jamshedpur FC chu MPL club thar Chawnpui FC-in par chhuah nan an hmang. Nilaini zan inkhelhah hian Jamshedpur-in Billu Telli penalty hmangin goal khung hmasa mah se Subham Ghosh-a'n lama tihluh avangin Chawnpuiin an sut a, Mizo club tan Lalramliana'n chakna goal a khung.

Chawnpui FC hian MPL club an nih hnuah a vawi khat nan hnehna an chang. Lalremtluanga kaihhruai team hian Thawhṭan zan hian Kanan FC an hmachhawn dawn a, an chak nawn a nih chuan match hnuhnung bera champion lai Chhinga Veng an bitum hunah inrintawkna nasa tak an nei thei ang.

Chawnpui assistant coach Rindika Hmar chuan, "Player hrawl nei l a chak dan kan zawn a ngai a, chumi mil chuan game plan leh training kan nei a, kan thawkrim bawk. Pathianin vanneihna min pe ve ta niin ka hria," tiin Vanglaini a hrilh.

An khingpui tur chungchang sawi zuiin Rindika chuan, "Team ṭha tak an ni a, an fitness a ṭha em em a, keeper an nei ṭha bawk. Chuti chung chuan 3-1 vela chak thei chu kan niin ka hria," tiin an khingpui ṭha mah se chak phu zawk an nih thu a sawi.