Mizoram Lockdown (inkharkhip): Ni 102

Spanish striker ropui Raul khan a vanglaiin Spain tan match 102-a khel hman a, goal 44 ngawt a khungsak. Mahse, Raul hian Spain 'golden generation' a thleng ve hman lo a, ram tan nomawi chawi a nei miah lo!

Real Madrid aṭanga inzir chhuak striker hi club tan erawh a ropui hle. Real tan season 16 chhung a khel a, inelna hrang hrangah match 741 khelin goal 323 a khung a, nomawi pawh a chawi kim hle. Spain club ropui tan hian La Liga (6), Champions League (3), Spanish Super Cup (4), UEFA Super Cup (1) leh Intercontinental Cup (2)-ah te a champion hman. 

Kum 2010-ah Real chhuahsanin Schalke 04 a zawm a, Bundesliga club hi a chuai tawh lama pan a ni chungin season hnihah match 98-a khelhsak a, goal 40 a la khung cheu! Schalke tan hian DFB-Pokal leh DFL-Supercup-ah a champion a, kum 2012 khan sum tamna Qatar lamah kalin Al Sadd a zawm - season hnihah match 61 khelin goal 16 a khung a, Qatar Stars League leh Emir of Qatar Cup-ah an champion. 

Kum 2015 khan New York Cosmos a zawm a, North American Soccer League club-ah hian season khat khelin football a mangṭha a, match 32-ah goal kua a khung. North American Soccer League: Spring Season 2015 leh Soccer Bowl-ah te nomawi a chawi leh hram a ni.