Blues leh Sarri ke chheh a la rem lo

Manager thar Maurizio Sarri kaihhruaina hnuaiah Chelsea an la khel fuh tawk thei lo. Nilaini zan khan Arsenal chu penalty shootout-ah 6-5 in an hneh lo, Gunners keeper Petr Cech-a'n penalty vawi hnih a dang.

Aviva Stadium, Dublin-a inkhelah a tir lama Antonio Rudiger tauh luh chu hun tawp hma second 17 chauh a awm tawh tihah Alexandre Lacazette-a'n a sut a, penalty pet zui niin, hun pangngaia Alvaro Morata penalty pet dangtu Petr Cech bawkin Blues tana pet hnuhnung ber Ruben Loftus-Cheek chhuih dang lehin a club hlui lakah Gunners a chakpui.

Premier League champion leh FA Cup nomawi kawl tute an inchuh ṭhin Community Shield chu Pathianni zan hian khelh a ni tawh dawn a, Wembley Stadium-a leng lut tur Blues hian Manchester City laka hnehna chan an duh chuan ngawrh taka inbuatsaih chhunzawm a ṭul ang.

Sarri naute la kim lo

World Cup khelh vangin striker Olivier Giroud, N'Golo Kante, Eden Hazard, Thibaut Courtois leh Michy Batshuayi te bakah Tim Cahill-a'n Chelsea training an la zawm lo a, England international Ruben Loftus-Cheek erawhin a chawlh hun ti tawiin team a zawm hma bik thung.

Chelsea tan midfielder Cesc Fabregas chu inkhel tir lamah a langsar, ball a sem hnemin keeper Cech tan hna a siamsak bakah chang tu nei loa awm defender Rudiger ball tauh luh tur a vawrh lut ṭha hle.

Hudson Odoi-a penalty hlawhchhuah pettu Morata hmelah inrintawk lohna hmuh theih tur khawpin a langsar a, Blues tana si ban nghak tawh ṭhin Cech tan hna harsa a siamsak lo. Real Madrid striker hlui hian season hmasa ang khan beisei a phak lo leh a nih chuan, tawnhriat ngah Giroud a pawimawh ang.

Pound maktaduai 50 man Jorginho-a'n inkhel bul ṭan lehin ball pass thiam tak a nihzia a lantir leh a, tihsual a neih tlem ṭhin hle–tharum hman hnemna EPL-ah fiahin a awm ang. Napoli midfielder hlui hi hun rei lote chhungin a insiamrem theiin a rinawm a, France international Kante nen an inkawp duh a nih chuan team tan a thlamuan thlak dawn.

Chelsea manager Sarri chuan, "July 16 khan kan training hmasa ber kan nei ṭan chauh a, Arsenal ai khan kan taksa a inpeih lo zawk a ni. Hun chanve hma lamah kha chuan kan khel ṭha hle, hun tawp dawn hnaiah kan chesual zauh mai chauh a ni," tiin a sawi.

Ramsey a bo?

Inkhel bul ṭan tura hming tarlan zingah Aaron Ramsey hming a lang a, mahse Welsh international midfielder hi khelmual chhungah hmuh tur a awm lo. Inkhel tura an inbuatsaihna lamah a tihrawl a hliam a, a aiah kum 18 mi Emile Smith Rowe luhtir a ni.

Kum 27 mi Ramsey hi hliam vanga awltir ni mah se tun hnaiah contract chungchanga an la inrem mai loh avangin khawthlang media-te chuan an sawi zawm nasa hle. Ramsey bakah defender Sead Kolasinac-a'n hliam tenau a tuar a, season ṭan hmain an dam hman ang em tih a chiang lo.

Arsenal manager Unai Emery chuan, "Ramsey hi na tak a nih loh kan beisei, Kolasinac erawh endik a ni phawt ang a, a dinhmun hi a danghlam hret mai thei," tiin a defender chu Victor Moses nen ball an inchuhna lamah a khup a hliam thu a sawi.

Gunners tan French second division aṭanga an lakluh Matteo Guendouzi-a'n ball pass thiam bik a nihzia a lantir chho zel a, a kum la naupangin tawnhriat nei tlem deuh mah se amahah theihna a awm tih hmuh theihin a awm.

Spnaish manager Emery-a'n a naute a khelhtir dan a la siksawi chho zel a, a tir lamah striker Lacazette awltirin Pierre-Emerick Aubameyang chu a laiah maltlat tir a ni. Sevilla manager hlui hian a hmatawng pahnihte hi a chhawr kawp a nih chuan a laiah Lacazette dahin, Gabon international hi tlan kual turin a sir lamah hun a hman tir zawkin a rinawm.

Arsenal XI:

Cech, Bellerin, Mustafi, Sokratis, Kolasinac, Elneny, Ramsey, Guendouzi, Mkhitaryan, Ozil, Aubameyang

Chelsea XI:

Caballero, Azpilicueta, Luiz, Rudiger, Alonso, Jorginho, Fabregas, Barkley, Pedro, Hudson-Odoi, Morata.