Mizoram U15 League awm dawn

Mizoram Football Association leh Tata Trusts ṭangkawpin an buatsaih, Mizoram Under 15 League chu August 4, Inrinni aṭang hian Rajiv Gandhi Stadium-ah khelh ṭan a ni ang a, team 10 an tel dawn.

Aizawl FC, Aizawl Grassroots Centre, Bawngkawn GSA, Chanmari FC, Competitors for Christ (Ramthar North), FC Stonzz (Armed Veng), Kanan FC, M 28 Academy (Republic Veng), Sihphir Venghlun FC leh Tata Trust COE te an inel ang.

Team tinte hi vawi hnih ṭheuh an inkhel kual ang a, a sang paliin semifinal an khel ang. He inelna hi India rama kum bithliah inelna changtlung ber pawl ni thei tura duan a ni.

Rajiv Gandhi Stadium-ah khelh ṭhin tur a ni a, Inrinni bakah sikul chawlh niin buatsaih ṭhin a ni ang. Ni khatah inkhel hi vawi nga awmin team 10-te hi an khel kim vek zel dâwn a ni.

MFA Grassroots and Youth Development Committee Chairman PC Vanlalhruaia chuan, "Football-a hma kan sawn zelna turah kum naupang lama ṭan lâk kan tum a, kan nauten thlà li chuang zet ṭha taka inkhelhna tur remchang an nei tur hi kan phur tawh a, player ṭha tak tak chher chhuahna a nih ngei kan beisei," a ti.

Tun Inrinni hian round hmasa ber khelh a ni dawn a, team 10 zingah Tata Trusts Centre of Excellence-in ngaihven a hlawh ang. He academy hi India Football technical director Colm Toal-a'n a enkawl a, India hmarchhak aṭanga naupang ṭha lak khawm inkhel hi a hmuhnawm tura beisei a ni.

Team 10 tel turte

Aizawl FC

Aizawl Grassroots Centre

Bawngkawn GSA

Chanmari FC

Competitors for Christ, Ramthar North

FC Stonzz, Armed Veng

Kanan FC

M 28 Academy, Republic Veng

Sihphir Venghlun FC

Tata Trust COE