Electric êng zual zel Semi final an hnaih ta hle

Nimin tlai khan LG Independence Cup-ah Electric Veng FC-in anni aia team ṭha zawka ngaih Ramhlun North 2-2 in an chelh a, semifinal lut turin an dinhmun a ṭha hle.

Lammual inkhelah hian Ramhlun North-in Lalnunmawia leh Lalliansanga te goal hmangin ṭum hnih hma an hruai a, Electric Veng FC-in David Lalchhuanawma leh Vanlalhmangaiha te hmangin an sut. MPL club thar EFC si phurh sutna goal khungtu Hmangaiha chu man of the match-ah thlan a ni.

Nizan khan Group A inkhel dangah Chanmari FC leh Aizawl FC te an inkhel a, result kan hre hman lo.

Ramhlun North hian August 4, Inrinni chawhnu dar 2:00 hian I League club AFC an hmachhawn dawn a, zan lamah Electric Veng leh point la hmu lo Bethlehem Vengthlang FC te an inhmachhawn ang.

Goal li
Minute thumna lekah Ramhlun North-in goal an khung nghal a, Electric Vengin corner aṭanga ball kal chu an clear theih loh avangin Mawitea'n a pet goal nghal. Electric Veng an ṭang a, goal hi inkhel tihmuhnawmtu a ni.

First half tawp hma minute sarih a la awmin defender Lalfelpuia leh keeper Lalsangliana Chawnglawi-te inkoh fuh tawk loh vangin Electric Veng forward David-a a inrawlh hman. Salem Veng tlangval David-a hian keeper Sangliana man hmain a tlawh a, ball chu la kual lehin keeper pet khumin si phurh sutna goal a khung.

Ramhlun North-in minute khat hnuah hma an hruai lehnghal a, corner bawk hmang ṭangkaiin Notea-a'n tun inelnaa a goal hmasa ber a khung a. First half-ah Ramhlun North-in 2-1 in hma an hruai.

Second half-ah Electric Veng tan an veng tlangval Hmangaiha'n minute 66-naah mawi takin a khung a, 2-2 a ni. Inkhel hmuhnawmah goal chance a tam a, penalty beisei vangin Ramhlun North forward Notea chu box chhungah tluin referee-in penalty pek awmah a ruat lo a, inkhel boruak nung sa a tihnun belh.

Team nem zawka ngaih Electric Vengin ṭum hnih ngawt si phur zawkah ṭang mah se inkhelah erawh an chungnung hret a, semifinal an beisei a nih pawhin a mak lo.

Dinhmun ṭha Electric Veng
Electric Vengin captain C. Laldinmawia awm lo chungin Ramhlun North an draw thei a, hei bakah hian team ṭha pahnih Aizawl FC leh Chanmari FC lakah point li an hlawh chhuak a, hneh loh an la tawng lo.

I Day Football-ah point inang a awm a nih chuan head to head en tur a ni a, Electric Veng tan chuan chanchin ṭha a ni. MPL kai thar hian an match hnuhnung berah BVT an hmachhawn dawn a, point thum an hmu thei a nih chuan an hmabak a êng hle.

Ramhlun North pawhin hneh loh an la tawng bik lo a, match hnih an khelh tawh aṭangin point li an hlawh chhuak a, amaherawhchu an hmaah Aizawl FC leh Chanmari FC an awm.

Ramhlun North coach Laltlantluanga Hnamte chuan, "Kan match hmasa ber aiin Electric Veng lakah kan khel ṭha zawk a, semifinal kan thlen theih lohna chhan tur ka hre lo," tiin Vanglaini a hrilh.