Premier League Rawlthar duhawm rual kan hmu dawn

August 10 a lo thleng ang a, Mizote nghahhlelh, football khawvelin a thlir rawn, English Premier League an khel ṭan dawn.

Khawvela footballer ṭha ber ber, manager ṭha ber ber fuankhawmna a nih miau avangin league ngaihven hlawh 'ber' a ni hi a mak lo a, chumi karah chuan rawlthar duhawm tak tak hmuh tur an awm leh bawk ang.

Season danga Premier League-a kan la hmuh ngai loh zingah Chelsea midfielder thar Jorginho, Liverpool trio Naby Keita, Alisson Becker leh Fabinho te kan hmu dawn a, Premier League ti nghahhlelhawm tu zinga mi an ni.

Harry Kane, Sergio Aguero, Mohamed Salah leh Paul Pogba te che tla vel hmuh a chakawm tawh a, heng tluk zeta mipui hmuh chak erawh rawlthar beiseiawm rual che tla tur hi a ni a, chutiang player chu tu nge ni ang tih hi Premier League nghakhleltute zawhna a ni leh der tawh.

James Maddison

Kum 21 mi, English midfielder duhawm hi Premier League-ah a la inlan ngai lo. Mahse, Leicester City lamin a theihna san zia hriain Norwich City aṭangin pound maktaduai 20-in an lalut a, season hmasaa a khelh dan a chhawm theih phawt chuan Foxes hian an tisual lo ang.

Attack nuam ti mi midfielder hi dead ball specialist ti hiala media ten an sawi hian season hmasa khan Norwich tan goal 15 ngawt a khung a, Leicester boss Claude Puel chuan, "English football-a hmabak nei eng ber a ni," tiin a sawi hial.

Ryan Sessegnon

Fulham midfielder hi kum 18 mi lek ni mah se season hmasa khan 'Championship Player of the Year'-ah thlan a ni a, hei hian a dinhmun chiang takin a hrilhfiah. Left back-a a career ṭantu winger hi Fulham chuan season hman zawh takah khan left wing-ah an chhawr a, a chhanna chu match 52-a goal 16 khung a ni.

Player tlan chak, positioning ṭha zet leh goal khung nuamti mi hi a kum anga en chi a ni lo a, Premier League-ah Fulham innghahna a ni dawn.

Ruben Neves

Nikum nipui transfer-ah khan Ruben Neves-a'n Championship record a siam a, Wolverhampton Wanderers chu Championship player manto ber ni turin Porto aṭangin pound maktaduai 16 ngawtin a zawm.

Wolves-in thutlukna an siam sual lo. Premier League inhlangkai tura an champion-na kawngah Neves chu player pawimawh ber ang hiala chhal ngam a ni a, kum 21 mi central midfielder hian goal ruk khungin a goal-te hi box pawn aṭanga a khung vek an ni.

Ethan Ampadu

Kum 17 mi Ethan-a'n season hmasa ṭan dawn khan League Two club Exeter City chhuahsanin Blues a zawm a, match sarih a khel nghal–Wales tan vawi hnih a inlan tawh bawk.

Swansea City leh West Brom midfielder hlui Kwame fapa hi defensive midfield leh centre back-ah chhawr kawp theih a ni a, pre-season tour-a an match hmasa pahnihah Gary Cahill awm loh laiin Andreas Christensen leh Antonio Rudiger aiah Maurizio Sarri chuan Ethan hi David Luiz nena inkawp dun turin a thlang–Italian boss hnuaiah a vul a nih pawhin a mak lo ang.

Phil Foden

FIFA Under 17 World Cup, nikuma India-in a thlen ṭum khan Manchester City midfielder hi Player of the Tournament-ah thlan a ni a, Mizo tam tak chuan kan hmelhriat tawhin a rinawm.

Pep Guardiola duh em em midfielder hian season hmasa khan City tan match 10 a khel a, USA-a pre season tour an neihah a che ṭha viau bawk. July 2017 khan Pep chuan, "Ani ang player ka hmuh lohna hi a rei ta," tiin Foden thiam chungchuan bik zia hi a lo sawi tawh.

Callum Hudson-Odoi

Kum 17 mi Chelsea forward hian Chelsea academy tan nomawi tam tak a lo chawi tawh a, pre season tour-ah Blues manager Sarri chuan Perth Glory, Inter Milan leh Arsenal an hmachhawn ṭumin inkhel bul a ṭantir vek.

Hudson-Odoi hian FA Youth Cup (2), U18 Premier League (1) leh FIFA U17 World Cup-ah nomawi a lo chawi tawh a, season hmasa khan Blues tan match li a khel.