Celtic-in Champions League hnaih zel

Brendan Rodgers enkawlna hnuaia Scottish football roreltu Celtic-in Europe-ah pawh an ram chin an zauh zel a, season thara Champions League khel turin an dinhmun a ṭha zel.

Scottish club hian Nilaini zan khan Champions League second qualifying round an khel a, third round lut turin Norwegian club ṭha Rosenborg an hnawt chhuak a, Champions League khel turin round hnih chiah an hmabak tawh.

Celtic hian Rosenborg hi khualmualah goal khung loin an inhnehtawkpui a, Celtic Park-ah 3-1 a an lo hneh tawh avangin an result hmasa hi round sang zawk inhlankai nan a tawk.

Inkhel hmuhnawm lo!

Team pahnih intawn hma­sakah goal li ngawt a lut a, Norway-ah erawh thawnthu a danglam thung. Mualneitu Rosenborg lamin minute 45 hmalam chu inkhel an thunun a, ball an chang tam zawk.

Mahse, Norwegian club hi beisei angin goal hmaah an hriam tawk lo a, si hnih faia hnehna an chan chuan away goal rule hmangin an tlang thei tih inhre mah se Marius Lundemo-a tauh goal tur nia lang Craig Gordon-a'n a lo dan chu chance hlauhawm tia chhiar theih awmchhun a ni.

Chawlhlawk hman a nih hnuah dinhmun ṭha zawk Celtic chu team hlauhawm zawk an ni a, Odsonne Edouard leh Scott Sinclair ten an hun ṭha neih goal-ah an chantir teuh hle - Rosenborg lamin Tore Reginiusses hmangin chance an nei ve leh zauh a, awmzia erawh a nei lo.

Hmabak chu

Celtic-in hnehna an chan avangin third round an inpetkai a, an hmaa ding leh tur chu Greek club ṭha AEK Athens an ni - Rosenborg ai chuan a harsa dawn tih a chiang a, Rodgers-a nauten Champions League khelh an duh chuan an theihna sang bera an khelhchhuah a ṭul ang.

August 7 zanah Celtic hian AEK hi an mikhual phawt ang - goal chhuah loh chu an hna hmasa tur a ni dawn. August 14 zanah third round second leg hi an khel leh ang a, hnehna an chang a nih chuan playoff khel turin an inpetkai ang.

Playoff an inpetkai a nih chuan Celtic hian team khat chiah hneh an mamawh tawh dawn tihna a ni a, hnehna an chang a nih chuan Champions League group stage khel turin an inpet tling ang - Rodgers enkawlna hnuaiah Champions League group stage an khel ve ve dawn tihna a ni.

Rodgers a hlim

Liverpool boss hlui Rodgers chuan, "First leg-a kan khelh ṭhat phawt chuan tlang a awlsam dawn tih hi ka chiang sa a ni," tiin Celtic Park-a an khelh ṭhat rah an seng thu a sawi.

Rodgers chuan an hmaah game hautak a inchhawp thu sawiin, "He inkhel zawhah hian round hnih kan la hmabak dawn. Mahse, Champions League khel tura chuti zat chak kan mamawh a nih chuan huaisen takin kan hmachhawn mai ang," a ti a, Europe-a club inelna sang bera a naute hruai a tum hle.

Greek club ṭha an nih avang­in AEK-in sulhnu an nei ropui a, an player neihdan enin Celtic tan a harsa dawn tih a chiang. Mahse, Rodgers chuan, "Keimahni ang thoin mihring 11 ve mai an ni," tiin an khingpui tur a hlau duh bik lo.