Muanawma telna Himalayan Tiger champion
Veteran player tana buatsaih nithum awh Badminton League khelh zawh takah, Mizo shuttler Lalmuanawma telna Himalayan Tiger chuan final-a an khingpui Sunriser Hyderabad Team chu 4-1 a hnehin champion nomawi an chawi.
Inelna hi Laqshya Badminton Academy-in a buatsaih niin, kum 35 chung lam tana siam a ni. Team paruk - Wristy Master (Delhi), Hyderabad Worrier, Himalayan Tiger, Rhino Smasher (NE), Shining Star leh Sunriser Hyderabad te an inel. Players turte hi lilam (auction) hmangin an lei hlawm a, he league hi Badminton Association of India in a pawmpui a ni.
Champion team tan Mizo tlangval Muanawma chu player pawimawh a ni phak, match tinah inlan vekin team mal bik hian 'Best Player' atan an thlang hial. Team tin hian player 16 neiin, mipa 12 leh hmeichhia 4 an ni - heng player-te hian category hrang hrang 7-ah inkhelin doubles vekin an khel.
Team paruk hian league round an khel hmasa a, an intum kual vek hnuah point hmu sang pali - Sunriser Hyderabad, Rhino Smasher, Wristy Master leh Himalayan Tiger-ten semifinal an khel. Himalayan Tiger hian league match bika hnehna an chan vek bakah Wristy Master hneh lehin, final-ah pawh harsatna an tawk lo.