Murray-a'n Edmund a hneh

World number 1 hlui Andy Murray chuan tennis court chhungah a dam chiang tawh tih a lantir chhunzawm zel. Nilaini zan khan Murray hian a hnampui Kyle Edmund hnehin Washington Open second round a paltlang.

Grand Slam vawi thum champion tawh Murray hian inkhel inhnehtawk takah 7-6 (7-4), 1-6, 6-4 in hnehna a chang a, a match lehpekah chuan Marius Copil a hmachhawn leh dawn a ni.

Kum 31 mi Murray chuan, "Forehand ṭha tak neih let ka tum a, a bik takin baseline aṭanga na taka ball vuak let theih leh ka duh bawk. Tun match bikah khan chutiang chu hmuh tur a awm a, hliam dam a lawmawm rual chiahin ka inkhelin hma a sawn hi a hlimawm zual hle," tiin a sawi.

Inkhel dangah cham­pion lai leh seeded pa­khatna ni bawk Alex Zve­rev chuan Malek Jaziri 6-2, 6-1 in a sawp, world number 3 hian third round-ah chuan a unaupa (brother) Mischa a hmachhawn leh ang. ATP Tour season nga an hman dun tawh chinah an vawi khat intawnna tur a ni.

Seeded pathumna David Goffin chuan fiahna hautak a paltlang, Belgium tlangval hian Pierre-Hugues Herbert chu 6-2, 1-6, 7-6 (7-5) in an hneh hram. Japanese player ṭha Kei Nishikori pawhin khawtual tlangval Donald Young lakah 6-3, 6-4 in hnehna a chang bawk.