A hun pangngaiah US Open khel dawn Inkaihhruaina dan hman tur a khirh

US Open 2020 chu a hun ruahman sa August 31 aṭanga September 13 chhungin Flushing Meadows, New York-ah khelh a ni dawn. Grand Slam inelna hi nei dawn mah se player leh a team ten dan leh hrai khirh tak an zawm a ngai dawn a ni.

United States Tennis Association (USTA) chuan US Open hi a hun pangngaia neih ngei an duh thu an sawi fo a, amaherawhchu sorkar lam remtih puina a ngai. Thawhlehni zan khan New York state governor Andrew Cuomo chuan an phalsak thu hi a puang.

Tennis inelna lian chungchang sawiin Cuomo-a chuan, "US Open kan nghakhlel takzet, August 31 aṭanga September 13 chhungin khelh a ni ang. A hmunah fans an awm dawn lo a, TV aṭanga en theih a ni dawn thung - kei pawhin ka en ang," a ti.

Democrat governor chuan sawi zawmin, "USTA chuan player leh inelna a inhnamhnawih zawng zawng chu uluk takin a veng dawn a, hripui an kai loh nan theihtawp an chhuah vek dawn a ni," tiin a sawi.

US hi ram hrang hrang zingah Covid-19 kai leh thihpui an tam berna hmun a ni a, nimin tlai thleng khan hri kai mi 2,208,402 an awm tling tawh; an zinga 119,132 chu an thi. Hri lengin a tihbuai karah pawh beiseina sang tak nen inelna an thleng dawn.

March thlatir aṭang khan coronavirus vangin khawvel pumah professional tennis khelh a ni tawh lo. Tuna an beisei dan chuan July thla chawhnu lamah hian inelna kalpui theih an inring, rinthu mai a la ni a; a taka hlawhtling tur chuan hmabak a la tam.

US Tennis Association chief Mike Dowse chuan, "Tennis hi social distancing zawm chungin ṭha takin a khelh theih a ni tih kan lantir dawn. Khawvel pumah infiamna lian leh langsar dangte pawh an chawl a, tunah erawh ṭhenkhat chu an khel leh tawh, keini pawhin ka ti ve thei ang," a ti.

US Open hma hian Western leh Southern Open chu Billie Jean King National Tennis Centre-ah August 22-28 chhung hian khelh a ni dawn bawk a, a hmuna entu an awm dawn lo - Grand Slam inbuatsaihna leh enchhina chi khat a ni nghal ang.

Mizo upa ten 'Buana hma a kherh' an tih ang deuh khan, US Open pawh hi an khelh ṭan hma aṭangin sawi leh sel a hlawh a, player langsar tam takin inelna kalpui an tum dan chu na takin an sawisel nghal.

Mipa world number 1 Novak Djokovic chuan, "Player tana dan leh hrai zawm ngai an siam hi chu a hautak lutuk, hetiang a nih chuan inkhelh loh mai pawh a ṭha zawk hial ang," tiin a lo sawi tawh.

Serbian tlangvalin a sawisel chhan pakhat ni 14 khunghran chu an kaltlang pui dawn ta lo a, player ten an team member neih tur zat erawh tih danglam a awm rih lem lo - inkhelhna hmunah ṭawiawmtu pakhat bak an nei thei lo ang.

US ram chhungah pawh inelna an neihna tur New York chu coronavirus kai tam bikna hmun a ni, nimin tlai thleng khan he khawpuiah hian mi 30,000 chuangin hri leng hi an thihpui tawh.

Champion lai Rafael Nadal chuan, "Tunah hian New York khawpuiah inkhel turin i kal duh em? tiin min zawt se, ka chhanna chu 'duh lo' tih a ni ang," tiin May thla tawp lam khan a lo sawi tawh - August thla tawpa Spanish tlangval ngaihdan hriat a châkawm hle.

Player chanchin ngah ve tak Nick Kyrgios pawhin United States Tennis Association chu mahni hmasial tiin a sawisel a, hmeichhe world number 1 Ashleigh Barty leh Simona Halep pawhin ngaihtuahna an sen ṭhat tur thu an sawi ve bawk.

Halep chuan, "Inkaihhruaina dan an siam hi a pumhluma hriat theih kan châk tawh hle, nghakhlel takin kan thlir mek. Tuna kan hriat theih ṭhenkhat hi chu a khirh lutuk deuh a, player tan harsatna tur a awm dawn," a ti.

•    New York khawpuia player zin lut tur reng reng chu thlawhtheihna an chuan hma ngeiin Covid-19 an kai em tih enfiah tur a ni.

•    Inelna neihna tur hmun an thleng tawh a nih chuan ni 14 chhung inkhunghran kha chu a ngai dawn lo.

•    US an thlen hnuah chawlhkar khat chhungin vawi khat emaw vawi hnih emaw hri an kai em tih endik zel a ni ang.

•    Player zin lutte chu hotel hmun khatah an awm dawn a, room pakhatah mihring pahnih bak an awm thei dawn lo. Awm khawmna ni ṭhin Manhattan pawn lama thleng duh an awm a nih chuan an thlenna senso chu mahni a intum tur a ni.

•    Mipa leh hmeichhe doubles inelna huangah inlan thei (pair) zat 64 ni 

ṭhin chu 32-ah tih hniam a ni.

•    A hmuna entu an awm thei dawn lo a, qualifying round leh mixed doubles inelna a awm lo ang.