Inter Milan-ah Vrsaljko
Italian club Inter Milan chuan right back Sime Vrsaljko chu Atletico Madrid aṭangin loan hmangin an hawh. Croatia international hawh man hi a tlawm lo, season khat chhung atan pound maktaduai 21.34 vel zet an pek a ngai dawn a ni.
Kum 26 mi Vrsaljko hi World Cup-ah khan ram tan player pawimawh a ni a, match sarih an khelh zinga parukah inkhel bul ṭan vekin goal venhim bakah an khingpui an nawr theih nan a ṭangkai thei hle.
2013 leh 2016 khan Genoa leh Sassuolo tan a lo khel tawh a, hei vang hian Serie A-ah a mikhual dawn lo - ram tana a khelhpui Ivan Perisic leh Marcelo Brozovic te an awm sa bawk. Khawthlang media-te chuan Inter hian Real Madrid midfielder Luka Modric pawh an beisei mek niin an tarlang.