Australia leh Spain an tlang

Women's Hockey World Cup khelh mekah Australia leh Spain te chuan Nilaini zan khan an khingpui hnehin semifinal an in vaw kai a, nizan khan quarterfinal match dang pahnih khelh niin, result kan hre hman lo.

Lee Valley Hockey and Tennis Centre, London-a inkhelah Austra­lia leh Argentina te hun pangngaiah goal lut loin an inhnehtawk a, penalty shoot out an vuak hnuah Argentina captain Delfina Merino-i'n hlahin, Australia tan Brooke Peris chuan chakna goal a vaw lut thung; 4-3 a hnehna changin, semifinal-ah chuan Netherlands leh England inkhela chak zawk an hmachhawn leh ang.

Inkhel pakhat zawkah Spain chuan hun tawp dawna Carmen Cano goal khat hmangin Germany lakah 1-0 in hnehna an chang. Pool C hmahruaitu ni chunga quarterfinal lut Germany lamin inkhel an thunun viau a, mahse pool match lamah 3-1 ngawt an hneh tawh ram lakah goal an khung theih tak loh avangin an zinkawng a tawp.

Spain hian India leh Ireland inkhela chak zawk an hmachhawn leh dawn. Mizo nula Lalremsiami Hmar telna India hian playoff-ah Italy an hneh a, pool match bika an ngam loh lakah hnehna an chang thei a nih chuan Spain lakah pawh inrintawkna an nei thei ang.

Women's Hockey World Cup-ah hian ram 16 an inlan a, August 5, Pathianni zan hian a hmawr bawkna neih tur a ni ang.