Ram danga inkhelh pawiti lo PSG

Paris Saint-Germain chuan France ram chhungah football khelh theih rih lo mah se ram danga inkhelh an pawiti lo. Paris club hian Champions League quarterfinal khelh hmabak an la nei a ni.

Covid-19 vangin infiamna khawvel a buai a, France prime minister Edouard Philippe chuan an ramah infiamna lian tham buatsaih a rem rih loh thu a puang a, Ligue 1 leh Ligue 2 pawh an ti tawp.

Tualchhung inelna zo tawh mah se PSG hian an duh ber UCL chu khelh ngei an la beisei. League an tihtawp tirh pawh khan rama danga inkhelh mai a ṭul a nih chuan an pawitih loh thu an lo sawi tawh bawk.

PSG president Nasser Al-Khelaifi chuan, "Sorkar thutlukna kan zah a, a do zawnga thil tih pawh kan tum lo. Amaherawhchu, Paris-ah khelh theih a nih loh pawhin UEFA nena inremsiam theih a nih chuan Champions League khelh hmabak kan la neih hi ram danga khelh kan duh," a ti.

Champions League chhunzawm dan tur hi he thu buatsaih lai hian tih chian a la ni lo a, media lamin an tarlan dan chuan August thla chhung hian khelh zawh theih tura ruahman a ni. Hmun khatah nge a hran hranah an khelh dawn tih erawh a la chuang lo.