Aizawl FC-in Chanmari an sawisa

I League club Aizawl FC-in Ningani zan khan Chanmari FC 6-0 in an sawp a, Mizo club ṭha pahnih inkara insawp nasat ber ṭum a ni.

LG Independence Cup-a inkhel result hian tualchhung football tuite a barakhaih a, MPL kaithar Electric Vengin Aizawl FC an hneh ang thoin boruak a lian.

MPL5 semifinal first leg-ah Chanmari FC-in AFC 4-1 in an sawp a, season liam ta I League-a coach ṭha bera thlan Gift Raikhan hnuaiah Aizawl FC-in an elpui lakah goal ruk khungin record thar an siam.

A goal mawlh mawlh
Aizawl FC-in Mizo winger tawnhriat nei ṭha Lalrinfela an lalut a, Khawlailung tlangval hian minute 20-na lekah freekick aṭangin a khung. Goal luh danah Chanmari keeper MS Dawngliana a dem theih lo a, Rinfela freekick a kawh ṭha a, goal ropui hian inkhel kalhmang a thlak.

Minute li hnu lekah Rinfela corner pet chu Lalrinchhana Tochhawng-in goal-ah a chantir a, 2-0 in first half a tawp. Second half-ah Lalkhawpuimawia chuan hattrick a siam a, Kelkang tlangval Mapuia hi man of the match-ah thlan niin Hmangaihkima'n goal khat a khung belh bawk.

I League club-in goal ruk zet an khung a, amaherawhchu goal luh dan aṭanga team pahnih teh a rem lo. Aizawl FC-in chak phu mah se an khelh dan thlirin Chanmari hi goal ruk ngawt chhuah tur chu an ni lo.

AFC an chungnung
Chanmari FC-in MFA Super Cup final thleng turin semifinal-ah Aizawl FC an hneh a, thla chanve pawh ral hmain goal ruk zet chhuahin an mualpho. Tualchhung club ṭha pahnih inkarah I League club an chungnung zawk.

Team pahnih hi inelna pali I League 2nd Division, MPL, I Day Football leh MFA Super Cup-ah te ṭum 28 an inhmachhawn tawh a, AFC hi vawi 15 chakin ṭum hnih chauh an inhnehtawk a, Chanmari hi vawi 11 an chak tawh thung.

Group A
Results & Fixtures
27 July, Zirtawpni
Chanmari FC 2–0 Bethlehem VT FC
CFC : Laldampuia 28'; Lalrammuana 90+1'
MoM: R. Lalawmpuia, CFC
Aizawl FC 1–2 Electric Veng FC
AFC : Lalkhawpuimawia 85'
EFC : Isak Vanlalpeka 18'; Vanlalhmangaiha 27'
MoM : Lalrinnunga Hnamte, EFC
31 July, Thawhlehni
Electric Veng FC 0-0 Chanmari FC
MoM : C. Laldinmawia, EFC
Bethlehem VT 1-2 Ramhlun North
BVT : Lalhlimpuia 71'
RNT : Vanlallawma 39'; Lalnunmawia 64'
MoM: Lalliansanga, Ramhlun North FC
2 August, Ningani
Ramhlun North 2-2 Electric Veng FC
RNFC : Lalnunmawia 3'; Lalliansanga 39'
David Lalchhuanawma 38', Vanlalhmangaiha 66'
MoM: Vanlalhmangaiha, EFC
Chanmari FC 0-6 Aizawl FC
AFC : Lalrinfela 20'; Lalrinchhana Tochhawng 24'; Lalkhawpuimawia 61', 66', 81'; Hmangaihkima 77'
MoM: Lalkhawpuimawia, Aizawl FC
4 August, Inrinni
2:00 PM Aizawl FC Vs Ramhlun North
7:00 PM Electric Veng FC Vs Bethlehem VT
7 August, Thawhlehni
2:00 PM Bethlehem VT Vs Aizawl FC
7:00 PM Ramhlun North Vs Chanmari FC