Ramhlun North nge AFC?

LG Independence Cup-ah Ramhlun North leh Aizawl FC tan semifinal-ah hmunruak pakhat chiah a awm tawh niin a lang a, chuvangin vawiin tlai dar 2:00-a MPL club ṭha pahnih inkhel tur hi quarterfinal tiin a chhal theih.

Aizawl FC coach Gift Raikhan chuan, "Ramhlun North hi team ṭha an ni a, MFA Super Cup-a kan hneh ṭum pawh khan player ṭha ṭhahnem tak ka hmu a ni. Chutihrualin match hmasa bera kan chak loh avangin point thum hmuh ngei a ngai a, attacking game kan khelh dawn," tiin Vanglaini a hrilh a, MFA Super Cup quarterfinal-ah I League club hi penalty shootout-ah an chak.

AFC hian an player pawimawh Alfred Kemah Jaryan chu hrem vangin an chhawr thei dawn lo a, Ramhlun North lakah Mizo hlanga an khelh a ṭul dawn tihna a ni.

Ramhlun North coach Laltlantluanga chuan, "Kan dinhmun thlirin chak ngei a ngai a, kan mamawh dan mila kan khelh a ngai. MFA Super Cup-ah kha chuan kan fitness a la ṭha lo a, tunah chuan nasa takin hma kan sawn tawh a, kan dam kim bawk," tiin a inrintawk thu a sawi.

Group A-ah Bethlehem Vengthlang an tla tawh a, club pali dang Aizawl FC, Chanmari FC, Ramhlun North leh Electric Veng ten semifinal luh beiseina an la nei a. Team nem bera ngaih MPL club thar EFC dinhmun a ṭhat ber avangin he group hi a ngaihnawm hle.