Electric Veng semifinal luh zan?

MPL kaithar Electric Veng tan LG Independence Cup semifinal lut turin point la hmu lo Bethlehem Vengthlang lakah point thum hlawhchhuah a tawk. Zanin dar 7:00 hi EFC leh BVT te inhmachhawn hun a ni a, Electric Veng semifinal luh zan a ni thei ang.

Electric Vengin MPL club an nih hnua an match hmasa berah I League champion hlui Aizawl FC an hneh nghal a, anni aia squad nei chhah zawka ngaih Chanmari FC leh Ramhlun North te an chelh thei bawk.

BVT an hmachhawn hunah Electric Vengin match hnuhnung bera hrem vanga an chhawr theih loh captain C. Laldinmawia bakah damlohna vanga an hman loh Zohmingmawia te an hmang thei tawh dawn a, an phur vanglai tak a ni.

Electric Veng manager Lalchhanhima chuan, "Ngaih ṭha taka awm tur kan la ni lo, BVT hi keini aia tawnhriat ngah zawk an ni a, chetsual theihna tur a ni. Chuvangin kan club tana match pawimawh takah hian kan innghahna veng mipuiin ṭha taka min ṭawiawm leh a ṭul a ni," tiin player 12-na mipui te chu inkhel en turin a sawm.