Tata Trusts CoE atan inremna thar ziak

Tata Trusts bul tuma Mizoram Football Asso-ciation leh Mizoram sorkarte nena ṭangkawpa buatsaih, football zirna hmunpui Centre of Excellence, Mualpuia 3rd Battalion MAP hmuna mi chu hun rei zawk kalpui turin nimin khan inremna ziah a ni.

He inremna ang hian Mualpuia Centre of Excellence building hi July 31, 2024 thleng Tata Trusts lam hian an hmang thei dâwn a ni.

A hmun hma neitu Mizoram Police aiawhin DGP Balaji Srivastava-a'n inremnaah hming a ziak a, MFA honorary secretary Lalnghinglova Hmar leh Biswanath Sinha, Zonal Head East and North East India, Tata Trusts-ten hming an ziak.

Tata Trusts-a India hmar chhak enkawltu Biswanath chuan, "CoE atan sum tam tak kan seng a, a hlawhtlin ngei kan duh a, hun rei zawk a hmunhma kan dawng thei tur hi a lawmawm takzet a ni," a ti.

DGP chuan football hmasawnna tur leh thalaite hmasawnna tura an hmunhma a lo ṭangkai thei chu thil lawmawm a nih thu a sawi a; MFA honorary secretary Tetea Hmar chuan, "Mizoramin football lama hma a sawn zel theihna tur hian a zirna hmun bîk changtlung tak a mamawh a, chutiang hmun min petu Mizoram Police leh football zirna dintu kan thawhpui Tata Trusts chungah kan lawm takzet a ni," tiin a sawi.

Tata Trusts Centre of Excellence ah hian India hmar chhak state hrang hrang atangin naupang 25 an awm mek a, coaching staff pariatin an vil. Naupangte hi Mizoram atangin16 an awm a, Manipur leh Assam aṭangin pali ve ve an awm a, Nagaland atangin pakhat a awm ve bawk. He hmunah hian football bakah lehkha zirna pangngai kalpui niin naupangte hi kum 15 hnuai lam an ni.