FA Community Shield ; Man City leh Blues ten season bul ṭan dawn

World Cup boruak a liam a, England bikah chuan football nipui bazar pawhin a vanglai a pel ṭan mek. Pathianni zan dar 7:30 hian Manchester City leh Chelsea ten FA Community Shield 2018 an khel dawn, season dang ang bawkin he inkhel hi Premier League khuhhawnna a ni ang.

1908 aṭanga khelh ṭan Community Shield hi league champion leh FA Cup nomawi kawl tuten an inchuh ṭhin a ni. Vawi 21 zet shield la tawh Manchester United chu sulhnu nei ṭha ber niin; Arsenal (15 titles) chu champion lai leh United dawttu an ni thung.

Tun ṭuma inkhel tur Man City leh Blues te hian Community Shield hi vawi li ve ve an chawi tawh a, tun hnaia club ṭhang duang tak pahnih hi an intiat tawk rih hle–an inkhelh zawh hnuah erawh club pakhat zawkin record an nei ṭha hret dawn tihna a ni.

EPL champion

Season hmasa khan Pep Guardiola nauten Premier League an thunun a, season chanve an hman thlen chuan an champion dawn tih a chiang deuh der tawh. Club ṭha dang inti ve te chu pahnihna nih inchuhin an inum a, a ṭha paruk an awm tawh avangin palina nih phak pawh a awlsam lo.

League pakhata team ṭha tamnaah Pep-a nauten hnehsawh taka ro an rel thei hian sawi zui a hlawh a, player lei nana sum an hman hnem piahlamah attacking game hmuhnawm khelin league bikah goal 100 an khung tling a, goal khung hnem leh point hmu hnem record thar an siam hial.

Man City hian league champion thei player an neih avangin team ṭha an nih thu inhrilh nawn a ngai lo, nipui bazarah winger Riyad Mahrez an neih belh bawk. Leicester City tana EPL champion ni tawh Mahrez hian team training a zawmna a rei tawh a, chutihrualin hliam tenau a neih avangin minute 90 chhung chu a khel lo mai thei.

Spanish manager Guardiola-a'n World Cup khelh vangin a player ṭha ṭhenkhat a chhawr thei dawn lo. Nicolas Otamendi, Sergio Aguero, Gabriel Jesus, Bernardo Silva, Benjamin Mendy, Ilkay Gundogan leh Ederson ten training an zawm pangngai tawh a, captain Vincent Kompany, Kyle Walker leh Fabian Delph te pawhin an chawlh hun ti tawiin an zawm tawh bawk.

Mahse, Kevin De Bruyne, Raheem Sterling leh John Stones te chuan August 6-ah an zawm ve dawn chauh, hei vang hian an ṭhat dan berin Chelsea an hmachhawn thei dawn lo a, season thara Arsenal nen an inkhelh hunah pawh player ṭha ṭhenkhat chuan inkhel bul an ṭan loh a rinawm.

Barcelona manager hlui hian inkhel tura inpeih chauhin khelmual an luh tur thu a sawi tawh a, hei vang hian Blues lakah player naupang ṭhenkhat hmun pek an nih pawhin a mak lo ang. Chutihrualin a kalna lam apianga champion zel duh manager a nih avangin chak ngei tumin a naute a rem ang tih a chiang.

Sarri hna hmasa

Antonio Conte-a'n season hnih chhungin Premier League leh FA Cup chawi mah se hna a chân tho a, an ban chhan nia lang lian tak erawh Champions League khel tura an tlin zawh loh vang a ni.

Italian manager Conte thlak tur hian a hnam pui Maurizio Sarri lakluh a ni. Blues manager thar tan hna a hautak dawn tih a chiang, nomawi chawi mai a tawk dawn lo a, inkhel hmuhnawm chhawp chhuah a ngai tel dawn–an beisei dan pawh a ni tel bawk.

Man City ang thoin Chelsea hian World Cup khelh vangin player ṭhenkhat an chhawr thei dawn bik lo. N'Golo Kante, Eden Hazard, Oliver Giroud, Courtois leh Willian te an la inlan lo ang. Russia-a zin ve tho, Cesar Azpilicueta leh Victor Moses te erawh bul ṭan turin an inpeih tawh thung.

Blues fans lamin an hmuh chak chu Jorginho a ni. France international Kante a la awm loh bakah Cesc Fabregas-a'n hliam tenau a nei a, hei vang hian Italian midfielder Jorginho mawhphurhna a sang zual dawn. Season hmasa lama inlan tam lo Ross Barkley leh beisei phak lo Tiemoue Bakayoko te tan fiahna a ni thei bawk dawn.

Stamford Bridge a pan hnuah Real Madrid striker hlui Alvaro Morata-a'n a ke a la chhep fuh hleithei lo, pre season lamah pawh beisei a phak lo hle. Arsenal lakah goal a khung loh bakah penalty a hlah hial a, Chelsea tan Barcelona forward hlui Pedro chu tlarhma lama hmachhuan tur a ni.