Magpies-ah Muto a chiang ta

Newcastle United chuan Yoshinori Muto an lalut chiang ta a, Bundesliga club Mainz aṭanga Japan striker lalut tur hian pound maktaduai 9.5 insengin kum li chhung atan contract an ziahpui.

Kum 26 mi striker hian season hman zawh takah khan goal riat khungin Mainz tan player pawimawh a ni a, season hman zawh taka Premier League goal 39 chauh khungtu Magpies harsatna a sutkian theih beisei a ni.

Muto chuan, "Japanese zinga Newcastle United player hmasa ber ka ni thei hi ka lawm takzet a ni. Result duhawm tak tak kan hlawhchhuah ka beisei a, Newcastle chanchinah ka hming hi chuan reng tir ka tum dawn a ni," tiin sang tak thlen tuma Magpies pan a nih thu a sawi.

Magpies hian nipui transfer-ah player panga an lalut tawh a, Muto hma hian Switzerland defender Fabian Schar leh Swansea midfielder Ki Sung-yueng te an lalut tawh a, season hmasaa an hnena loan-a khel pahnih zingah goalkeeper Martin Dubravka chu a ngheta lalutin Chelsea midfielder Kenedy chu loan bawkin an hawh leh bawk.