India beiseina a tawp

Women's Hockey World Cup-ah India nulate chu quarterfinal paltlang zo loin an zinkawng a tawp. Ningani zan inkhelah India leh Ireland te hun pangngaiah goal lut loin an inhnehtawk a, penalty shootout neih a nih hnuah India hi 3-1 in an chak lo.

Lee Valley Hockey and Tennis Centre, London-a inkhelah Mizo nula Lalremsiami Hmar chuan bul a ṭan leh a, tlarhmaah captain Rani Rampal nen inkawpin Ireland tlarhnung tan hna hautak an siam zeuh zeuh. Mahse, Siami leh a ṭhianten goal an hlawhchhuak thei lo a, Italy laka attacking game mawi khel thei hian tharum ngah Ireland tlarhnung an su hawng thei lo.

Quarter li chhungin goal a lut lo a, penalty shootout hmangin chak zawk zawn a ngai. India keeper Savita Punia-i'n penalty a hmachhawn pahnih a dang thei a, mahse India tan Rani Rampal, Monika leh Navjot Kaur ten an hlah vek laiin; Ireland player Roisin Upton, Alison Meeke leh Chloe Watkins ten an khung thung.

India leh Ireland te hi Pool B-ah awmdunin, pool match-ah pawh Ireland hian 1-0 in hnehna an lo chang tawh bawk. 1974 hnu lama a vawi khat nana semifinal thlen beiseitu India erawh an tum ram thleng loin an tawp.

Hmeichhe Hockey World Cup hi zaninah semifinal khelh zui a ni dawn a, Ireland hian Spain an hmachhawn dawn. Inkhel lehlamah Netherlands leh Australia an intawng thung ang - Pathianni zanah a hmawr bawkna neih zui leh nghal tur a ni ang.