Juventus-ah Bonucci a kir ; Higuain-a'n Milan a pan thung

Serie A transfer a ngaihnawm zel–Leonardo Bonucci chuan AC Milan-ah season khat hun a hman hnuin Juventus-ah bawk a kir leh ta a, Juve strtiker Gonzalo Higuain chu Milan lamah a kal thung.

Juventus centre back Mattia Caldara chu Milan lamah hian kaltir a ni bawk–kum 24 mi defender hi Juventus chuan Bonucci laklet nan an theh chhuak a, club pahnihin pawisa sen belh loin player an inthleng.

Bonucci leh Caldara hlut zawng hi pound maktaduai 31.2 ve vea chhut a ni. Higuain-a'n season khat chhung atan loan-in Milan hi a zawm phawt a, kum khat hnuah a nghetin contract a ziak thei ang.

Bonucci a kir

Kum 31 mi defender hian season hmasa ṭan dawn khan AC Milan hi a pan a, a man zat chu pound maktaduai 35.1 a ni. Inelna hrang hrangah match 51 khelh sak hmanin goal hnih a khung a, tunah erawh a hmangaih hmasaah a kir leh ta.

Juventus chuan thuchhuah siamin, "Kum sarih chhung hun duhawm tak kan hnena a hman hnuin Bonucci chu a lo kir leh ta. Nomawi tam tak chawi dun leh turin kan inpeih a ni," an ti.

Bonucci hian Juventus tana a khelh hmasakah a career-a hun duhawm bera chhal ngam a tawng–Serie A-ah vawi ruk a champion pui a, Coppa Italia (3) leh Supercoppa Italiana (3)-ah champion pui bawkin Champions League final-ah vawi hnih an inlan.

Ronaldo In; Higuain out

Juventus-in pound maktaduai 100-a Cristiano Ronaldo an lei khan Portuguese forward an neih hmaa an player hlawh hnem ber Higuain an chhuahtir a rinawm daih tawh a, rin lawk ang ngeiin Argentine striker a chhuak ta – a pan lam erawh beisei loh lam a ni.

Kum 30 mi striker hian Napoli lama a pu hlui Maurizio Sarri hnung zuiin Chelsea a pan dawna ngaih a ni a, mahse Serie A lamah bawk hun hman chhunzawmin Milan player thar a ni dawn ta zawk.

Milan hian Argentine striker an hawh manah pound maktaduai 16 an pe phawt ang a, season tawpah a ngheta lakluh an duh a nih chuan Juve hnenah hian pound maktaduai 32.04 an pek belh leh ang.

Higuain sulhnu

Juventus hian kum 2016 khan Serie A record ni turin Higuain hi pound maktaduai 75.3-in an lalut a, thutlukna an siam sual lo. Real Madrid striker hlui hian a season hmasa berah match 55 khelin goal 32 a khung nghal a, season hman zawh takah khan match 50 khelin goal 23 a khung bawk.

Turin club-ah season hnih hun a hman chhungin match 105 khelin goal 55 a khung a, heng season hnihah hian Serie A leh Coppa Italia nomawi a chawi ve ve bawk–heng season hnihah hian Juventus chuan an club 'Player of the Year'-ah an thlang ve ve.

Mahse, Champions League nomawi chawi duha tuihal Juve-in Ronaldo an nei tawh miau a, Higuain an mamawh tawh lo–Napoli tan season khata goal 36 khunga Serie A record lo siam tawhtu Higuain-a'n Juve tihsual pholan a duh ang.

Tu nge Caldara?

Bonucci leh Higuain transfer karah Mattia Caldara hming a lang nawlh a, Milan-in Bonucci nen meuha 'in thleng' an phal defender hi eng ang taka ṭha nge a nih, tih chu football ngainatute zawhna a ni.

Kum 24 mi defender hian January 2017 khan Juventus hi a zawm ve chauh a, pound maktaduai 22 vel thlenga a man sang chho thei turin tih a ni. Mahse, a club khelhna Atalanta lamah loan-a kir tir niin Juve tana a khelh hmain Milan lamah hralh a ni leh ta.

Milan chuan Higuain leh Caldar an lakluh chungchangah thuchhuah siamin, "Gonzalo leh Mattia hi club-in bung thar kan kaina tura hmasawnna pawimawh tak a ni," an ti a, an phur hle.