Europa League Burnley-in Europe an hnaih zel
Premier League club Burnley-in Europa League an hnaih chhunzawm zel a, an mikhual Aberdeen chu Ningani zan khan 3-1 in a hneh - inkhel hmasa nen belhkhawma an chakna zat hi 4-2 a ni a, third round khel turin an inpet tling.
Burnley hian awlsam tak erawhin hnehna an chang bik lo. Chris Wood-a'n minute rukna lekah goal hmahruai khung mah se Scottish club tan Lewis Ferguson chuan minute 27-naah a sut a, inkhel hmasaah 1-1 a an lo inhnehtawk tawh bawk si avangin extra time khelh a ngaih phah.
Minute 101-naah Jack Cork-a'n Bunrley beiseina siamin an goal hnihna a khung a, hun tawp nan minute ruk chiah a awm tawh tihin Ashley Barnes chuan penalty hmangin a khung ve leh bawk a, 4-2 in Burnley an chak.
Inkhel hmuhnawm
Scotland-a team pahnih intawn hmasak ṭumin 1-1 in an lo inhnehtawk tawh a, Burnley-in goal an chhuah loh chuan away goal rule hmangin an tlang thei tih an hria.
Mahse, Burnley-in Scotland-a an goal neihsa ringa tlang an tum lo. Chris Wood chuan hma takah goal hmahruai a khung nghal. An hlim chhung erawh a rei lo. Team huaisen Aberdeen tan Ferguson chuan overhead kick hmangin mawi zetin an si phurh a sut.
Burnley lamin an nawr chhunzawm. Mahse, Aberdeen goalkeeper Joe Lewis a che ṭha a, Barnes leh Sam Vokes te hun ṭha neih chu ṭha zetin a dan sak - minute 30 pek belh a nih hnuah erawh an ṭang tlang thei ta lo a, Burnley lamin goal hnih an khung belh avangin an tlang.
Hmabak inchhawp
Burnley-in hnehna an chan avangin third round an inpetkai a, playoff khelh inbeiseiin Turkish club Istanbul Basaksehir F.K. an hmachhawn ang - hnehna an chan chuan playoff an inpetkai leh ang a, an chak chuan group stage an thleng ang.
Third round khel tur hian August 9 zanah Burnley hi Turkey-ah an zin ang a, August 16 zanah Basaksehir hi an mikhual ve leh thung ang. Season hmasaa Turkish Super Lig-a pathumna club hian sum an neih avangin player an nei hraw a, Burnley tan hna a awlsam lo ang.
Tlarhmaah Arsenal leh Manchester City striker hlui Emmanuel Adebayor chu an innghahna a ni a, Real Madrid tan pawha khel tawh striker hian season hmasaah khan goal 17 ngawt a la khung thei. Adebayor bakah hian Schalke defender hlui Junior Caicara, Arsenal leh City defender hlui Gael Clichy, Barcelona forward hlui Arda Turan te ho an kawl.