Arsenal champion ring lo tu Kanu

Unai Emery kaihhruaina hnuaiah Arsenal chuan Premier League-ah beisei an nei sang hle a, mahse Gunners striker hlui Kanu ngaihdan erawh a dang. Kanu hian a club hluiin league nomawi an chawi a nih chuan 'thil mak' a ni ang tiin a sawi.

Paris St-Germain boss hlui Emery-a'n season 22 chhung hna ngai chelh tawh Arsene Wenger a thlak a, Spanish manager tan league nomawi chawi chu thil awlsam a ni dawn lo - club lian dang panga an el dawn a, palina nih phak pawh a awlsam dawn lo.

Arsenal tana league nomawi vawi hnih chawitu Kanu chuan, "League champion an nih chuan thil mak a ni ang. Player thar leh manager thar chuan an ṭhatna tak lanchhuah tir turin hun an mamawh a, an insiamrem nan hun pek a ngai a ni," tiin season khatnaah hlawhtlin nghal a harsat thu a sawi.

Nipui bazar chhungin Gunners hian Uruguay international Lucas Torreira, goalkeeper Bernd Leno, defender Stephan Lichtsteiner, Sokratis Papastathopoulos te bak­ah midfielder Matteo Guen­douzi a lei tawh a, pre sea­son an hman chinah a player thar ṭhen­khat hi an che ṭha nghal hle.

Nigeria international hlui Kanu chuan sawi zawmin, "Goal chhuah loh pawimawh zia an hria a, player a lakluhte hi ṭha tak vek an ni. Inkhel ṭhenkhatah chuan 1-0 chauh a chak ngaih dan an hriat a ngai a, a pawimawh ber chu point thum hmuh a ni," tiin inkhel ṭhenkhata goal khung ṭeuh ringawt aiin, zawi muanga tha thlah si loa kal a pawimawh thu a sawi tel bawk.