Marin lakah Saina a tlawm

Saina Nehwal chuan a tum ram a thleng zo leh ta lo. Badminton World Championship quarterfinal khelh mekah India nula hi khel ṭha chho viau mah se, nimin khan world number 1 hlui pahnih inkhelah Carolina Marin a dingchang zawk.

Player pahnihte hi 2015 khan final-ah an intawng tawh a, Rio Olympic champion Marin zawk a chak, tun ṭumah pawh Spanish shuttler hian 21-6, 21-11 in hnehna a chang nawn a ni. Vawi kua an intawn tawhah Marin hian ṭum khatin hnehna a chang tam zawk ta chiah bawk a ni.

Kum 28 mi Saina chuan, "Marin hi a che rang em em a, hun rei lote chhungin court chhung hi a tuam chhuak hman ṭhin. Niminah inkhel hautak ka hmachhawn zo chiah a, player ṭha tak hmachhawn leh nghal chu a awlsam lo a ni," tiin a sawi.

Nimina Indian shut­tler inkhel dangah mixed doubles pair Satwiksairaj Rankireddy leh Ashwini Ponnappa te pawhin semifinal an lut zo lo, Chinese duo Huang Yuxiang leh Zheng Saisai te ṭangdun lakah 17-21, 10-21 in an chak lo.

Hmeichhe singles champion tura rinkai Tai Tzu-ying pawh nimin khan a chak lo. World number 1 Tai-i hi Chinese nula He Bingjiao lakah 21-18, 7-21, 21-13 in a chak lo a ni - Bingjiao hian semifinal-ah Marin a hmachhawn leh ang.