Murray-a'n quarterfinal a lut

US Open inbuatsaih nana an hman tournament ṭhenkhat zinga pakhat Washington Open khelh mekah Andy Murray chuan set hmasa a hloh zet hnuah hnehna a chang let a, Britain tlangval hian harsa takin quarterfinal a in vaw kai.

Nimin zing inkhelah Murray-a'n bul a ṭan fuh lo zawk, harsa lutuk loa paltlang theih tura ngaih Romanian tlangval Marius Copil chu 6-7 (5-7), 6-3, 7-6 (7-4) in a hneh hram a, inkhel a zawh meuh chua an ram sanaah zing dar thum leh minute hnih a ni tawh.

Kum 31 mi Murray hian 2017 Wimbledon hnua a vawi khat nan quarterfinal a inhlangkai ve leh ta a, semifinal thleng tur chuan Alex de Minaur of Australia a paltlang leh phawt a ngai dawn a ni.

Grand Slam vawi thum champion tawh Mur­ray chuan, "Kan inkhelh zawh hun chu ka duh dan a ni lo a, player tan pawh a ṭha lo hleah ka ngai," tiin zan rei lutuka an inkhelh chungchang a sawi.

World number 1 hlui Murray hi a khel bawr hliam zai a nih avangin thla 11 chuang a inkhel thei lo a, hei vang hian a dinhmun pawh a tlahniam hman hle. Tunah hian world ranking-ah 832-na niin, tun season chhunga Grand Slam hnuhnung ber tur US Open atan ngawrh takin inbuatsaihna a nei chho mek a ni.