Messi - 700 Not Out; Barca - Out?

Thawhlehni zan khan Lionel Messi chuan a career-a a goal 700-na a khung. Hetihlai hian a team Barcelona an chak zo lo a, champion tur intihsiakna aṭangin an 'out' tawh a ni mai em? 

La Liga beisei Barca hian Champions League khelh tum Atletico Madrid chu Nou Camp-ah an mikhual a, 2-2 in an inhnehtawk - La Liga khelh chhunzawm leh a nih hnua point an hloh vawi thumna a ni. Barcelona hi an chak zawh loh avangin table-ah pahnihna an nih chhunzawm a, Real Madrid aia match khata khel tam chungin point khatin an hnufual tawh. 

Real Madrid hian zanin dar 1:30-ah Champions League khelh beisei Getafe chu an mikhual dawn a, Zinedine Zidane-a naute hian hnehna an chang a nih chuan point liin Barca an tlansan ang. 

Nou Camp-a inkhelah goal li a lut a, goal lut hmasa ber hi 'own goal' a ni a, a bak zawng hi penalty aṭanga lut a ni thung. Minute 11-na lekah Diego Costa chuan goal a khung nghal a, an lamah a ni thung. 

Messi corner aṭanga ball kal chu Costa hian tauh chhuah a tum a, mahse a ke chhep sualin an lamah a thai lut ta zawk. Atletico-in si phurh rei erawh an tum lo hle. Goal an chhuah aṭanga minute riatna lekah Yannick Carrasco chuan sawisel theih takin penalty a hlawh chhuak. 

Costa a lo pen chhuak a, Barca keeper Marc-Andre ter Stegen chuan dansak mah se VAR rawn a nih hnuah a line aṭangin a lo tlan chhuak hman tih hmuh a ni a, goal-ah pawm a ni lo. Atletico tan Costa-a'n a pet nawn tawh lo. Saul Niguez zawk rawn pen chhuakin a pet goal a, Ter Stegen chu chiang zetin a rawn bum. First half-a goal dang lut loin chawlhlawk an hmang zui. 

Minute 50-na a ni a, Barcelona penalty hlawhchhuah ve hun a ni. Nélson Semedo penalty hlawhchhuah hi Lionel Messi chuan 'panenka' hmangin a chhuih lut a, Jan Oblak a bum chiang hle. 

Messi-a'n penalty a pet hian Atletico nen 1-1 in an inhnehtawk mek a, a pet goal chuan a goal 700-na tur a ni thei bawk - a pressure a sang hle. Mahse, Messi-a'n boruak sang karah pawh player class bik a ni tih pholan a duh a, 'panenka' hmang ngatin a goal 700-na chu a chhinchhiah ta. 

Barca fans hlim viau mah se Messi goal 700-na hi an chakna erawh a ni lo. Carrasco bawkin Atletico tan penalty a hlawh chhuak a, Saul bawkin goal-ah a rawn chantir, 2-2 a ni. Ter Stegen tan Saul-a penalty hi dan theih ni mah se a kut 'tha' a chak tawk lo a, a dang per lut. 

Catalan club-in Messi freekick Oblak-a'n ṭha zeta a dansak te leh penalty an chawi te thlirin vanduai an inti ngeiin a rinawm a, Atletico-in Diego Costa tauh luh tak loh te an thlir chuan thawnthu dang sawi tur an nei thung ang. 

Barca leh Atletico inkhelh hmaa sawi hlawh tak chu Quique Setien a ni a, Ernesto Valverde duh loa Barca-in an lakluh coach hian an beisei angin result a la pe thei lo - a ban mai ringtu an tam hle. 

Setien hi tun kar tir khan Barca president Josep Maria Bartomeu nen inhmua sawi an ni a, zeldin thu nen an ziak nasa hle. Setien chuan, "Bartomeu nen kan inhmu ngei a, kan thusawi erawh sawichhuah a ṭulna a awm lo," a ti. 

Kum 61 mi coach chuan dinhmun hlauhthawnawma ding anga an sawi chu a pawm loh thu sawi zuiin, "Min ban mai hlauhthawnna hi ka la nei lo. Harsatna kan neih belh zel erawh pawi ka ti a, nomawi kan hlat tial tial a ni. 

"Mahse, theihtawp kan chhuah chhunzawm zel a ngai," a ti. Barca hian La Liga khelh chhunzawm leh a nih hnua match ruk an khelhah vawi thum an khingpui an 

inhnehtawkpui tawh.

June 30, Ningani Zan

Mallorca    5 - 1    Celta Vigo

MAL: Ante Budimir 13' (P), 52'; Cucho Hernández 27'; 

   Alejandro Pozo 40'; Salva Sevilla 60'

CEV:  Iago Aspas 50' (P)

Leganes    0 - 3    Sevilla

SEV:  Óliver Torres 23', 35'; Munir 82'

Barcelona    2 - 2    Atletico Madrid

BAR: Diego Costa 11' (OG); Lionel Messi 50' (P)

ATM: Saúl Niguez 19' (P), 62' (P) 

Zanin Inkhel Tur

Eibar        11:00 PM    Osasuna

Real Sociedad    11:00 PM    Espanyol

Real Madrid    01:30 AM    Getafe    

Lionel Messi-a'n ram leh club tan a career-ah goal 700 a khung tling ta a, football khawvela hun la hmang mek zingah Cristiano Ronaldo (726 goals)nen chiah goal 700 khung tling thei an ni. Messi hian Barcelona tan match 724 khelin goal 630-a khung a, ram tan match 138 khelin goal 70 a khung bawk. Goal 700 khung tur hian match 862 a mamawh. 

Ronaldo-a'n October khan ram leh club tana a goal 700-na a lo khung tawh a, goal 700 khung tling tur hian match 973 a mamawh thung - Messi aiin match 111-in goal 700 khung tur hian hun a mamawh hnem zawk tihna a ni. 

Messi hian kum 11 liam ta chhung kham kum tinin ram leh club tan goal 40 a khung tling ziah a, tun hnai kum 10 zinga kum kuaah khan goal 50 aia tam a khung vek.  Argentine forward goal 700 zinga 582 hi a ke vei lam aṭanga chhuak a ni a, goal 92 hi a ke ding lam hmanga a khung a ni thung - goal 24 chauh hi a tauh luh a ni. Messi goal khung zinga 52 hi freekick aṭanga lut a ni a, goal 700 hi a tauh luh an ni thung - goal 580 hi penalty box aṭangin a pet lut a, goal 120 hi penalty area pawn aṭanga a khung a ni bawk. 

Atletico Madrid thiampuipa a ni ṭhin a, season ṭan dawn khan club tam tak duhtu karah Antoine Griezmann-a'n Barcelona a zawm a, a man ringawt pawh euro maktaduai 120 lai a ni.Mahse, French forward hian Setien-a hnuaiah hmun a chang phak meuh lo a, a club hlui Atletico an hmachhawnna inkhelah pawh hian minute 90-naah Setien hian a luhtir ve chauh!

Griezmann aiah hian La Masia chhuak Riqui Puig luhtir a ni a, Atletico-a a ropuina ang kha neih let leh a duh a nih chuan season thara Barca chhuahsan tura rilru sen chu kum 29 mi forward tan thil finthlak a ni ang. Setien chuan, "A rawn luh khan inkhel thlak danglam turin hun a tlem tawh tih ka hria a, ka titi pui ang. Ngaihdam dil erawh ka tum lo a, ṭha ka tih angin thutlukna ka siam a ni," a ti! Atletico boss Diego Simeone chuan, "A chungchangah engmah sawi tur ka nei lo," tiin Griezmann chungchanga zawhna a chhang a, French forward hma hun hriat a châkawm ta hle.