World Cup Twenty20 a thlen rinawm lo

Cricket Australia chairman Earl Eddings chuan kumina World Cup Twenty20 an thlen tur chu coronavirus vanga neih loh mai a nih a rin thu a sawi a, beiseina a nei lo. 

ICC Men's T20 World Cup hi ruahman ang chuan  October 18-ah neih ṭan tur a ni a, November 15 thleng neih tura ruahman a ni - khawpui pasarihin an thleng dawn. 

Mahse, Eddings chuan, "Covid-19 hri lengin ram tam zawk a la tuam laia ram 16 kal khawm hi thil tih theih loh deuhthawah kan ngai a, a harsa khawp ang," a ti. 

March 13 hnuah international cricket chu khelh a ni leh tawh rih lo a, Eddings chuan ICC hnenah hmalak theihna tura ruahmanna an neih te an thlen thu an sawi. 

April khan International Cricket Council (ICC) chuan Australia-a T20 World Cup neih tur leh February leh March-a New Zealand-in a thlen tur  Women's 2021 World Cup chu ruahman sa anga an kalpui reng thu an lo sawi tawh a, Covid-19 in reh lam a pan tak lohah chuan an ruahman anga an kal zel erawh a rinawm loh.