Southampton-in neitu thar an nei ; An bazar dawn em?

Jack Grealish-a man zat chu pound maktaduai 100 a ni a, Southampton-a 80% share nei tura sum ngai zat chu English midfielder man zat chiah hi a ni!

Serbian sumdawng hausa tawntaw Dragan Solak-a thlawp company Sport Republic chuan Saints-ah pound maktaduai 100-in 80% share an lei a, Chinese sumdawng hausa Gao Jisheng chuan a share neih zawng zawng a hralh.

Saints-in neitu thar an neih rualin fans tam tak rilruah zawhna a awm nghal a, English club hi transfer bazar-ah an che na nghal ang em, tih chu a ni a, fan-ten beiseina nen an ring an fan.

Chutihrual chuan Solak hi hausa thawkhat viau mah se neitu thar neih hnua sum hmang na Manchester City, Chelsea leh Newcastle United te anga bazar huau huau tura beisei chi erawh a ni kher lo ang.

Hralh chhan
Chinese sumdawng hausa Gao chuan kum 2017 khan Katharina Liebherr hnen aṭangin Saints-a 80% share hi a lei. Liebherr hian a pa Markus hnen aṭangin Saints hi a rochun a ni a, tuna Gao-a'n a share a hralh pawh hian a share 20% chu a ngai rengin a la nei.

Gao-a'n Saints-a share a lei lai hian League One an la khel a, hetihlai hian Chinese sorkar chuan an sumdawng hausate chu ram pawnah infiamna khawvela an sum peipung turin a ti a, hei hi Gao pawhin Saints a lei chhan a ni.

Mahse, China sorkar hi a dinna ngaiah a ding reng lo. An ram sumdawng hausate a fuih hnu lawkah ram pawn infiamnaa sum thehthang chu a thlawp leh lo a, Gao hi lai takin a awm phah.

Chinese sumdawng hausa hian Premier League thlengin he team hi kaihruai chho mah se hralhna tur a melh reng a, a tawpah chuan Dragan Solak nen an inbe rem ta.

Tu nge Solak?
Solak hi broadband, cable leh TV firm United Group neitu a ni a, a company hian kum khatah pound tluklehdingawn 1.67 vel a nei nia sawi a ni a, a mimal hausakna hi pound tluklehdingawn khat vel nia sawi a ni.

Serbian mi, an rama seilian zinga European billionaire hmasa bera sawi hian firm 100 chuangah share a nei nia sawi a ni a, a chenna in hlut zawng pawh pound maktaduai 10 vel bawr a ni a, private jet ringawt pawh pathum a nei!

Saints a lei theih nana a thawhpui zinga mi Rasmus Ankersen hi Sport Republic chief executive a ni a, Brentford-ah director of football hna thawkin Premier League an kai theih nana thawhhlawk ber zinga mi a ni a, Danish Super League club FC Midtjylland-ah executive chairman a lo ni tawh bawk.

Sport Republic chairman Henrik Kraft hi sports technology company lamah chuan investor hriat hlawh a ni a, an vanneihna ber erawh Ankersen an nei hi a ni. Sky Sports television presenter Kaveh Solhekol chuan, "Brentford-a kum ruk a awm chhunga Ankersen-a hnathawh en ila, tun dinhmun an thlen chhan a ni," a ti.

Hmachhawp chu
Sport Republic chairman Kraft chuan, "Saints kan duh chhan chu kalphung pangngai tak nei saa kal club an nih vang a ni a, thil danglam rawn thlen hluai kan tum hran lo a, mahse, he club tan hian ni tinin theihtawp kan chhuah reng ang," a ti.

United group chairman Solak chuan, "Southampton kan lei thei hi kan lawm takzet a, hmachhawp kan neih leh hma lak zelna turah Saints hian hmun pawimawh tak a chang dawn a ni," a ti a, khawthlang media ṭhenkhat chuan Solak leh a ṭhiante hian City Group leh Red Bull group te anga club hrang hrang nei tura hma lak an tum niin an sawi a, a bul ṭan nan Saints hman an tum.

Manchester City neitu City Football Group hian A League club Melbourne City FC (100%), Uruguayan club Montevideo City Torque (100%), Belgian club Lommel S.K. (99%), US club New York City FC (80%), ISL club Mumbai City FC (65%), La Liga club Girona FC (47%), China League One club Sichuan Jiuniu F.C (29.7%), J League club Yokohama F. Marinos (20%) leh Ligue 1 club Troyes AC (100%) ah te share an nei.

Red Bull hian Bundesliga club RB Leipzig, Brazilian club tenau Red Bull Brasil, Austrian champion FC Red Bull Salzburg leh MLS club lar New York Red Bulls an nei thung.