Magpies defender thar tur Trippier

Newcastle United-in inthuam chak hna an thawk ṭan a, Atletico Madrid full back Kieran Trippier chu pound maktaduai 12-a lalut turin inremna an neihpui a, a khelh ṭhat dan a zirin a man hi la pung leh tur a ni.

Euro 2020 final-a England hruai thlengtu zinga mi Trippier-a contract rei zawng tur hi tarlan a la ni lo a, he thuziak i chhiar meuh chuan a chiang tawh hial ang.

Kum 31 mi Trippier hian kum 2019 khan Tottenham Hotspur aṭangin Atletico Madrid chu pound maktaduai 20-in a zawm a, inelna hrang hrangah match 83 a khelhsak tawh a, season hmasa khan Spanish La Liga-ah a champion pui.

Mahse, Trippier lung a leng a, Premier League-a kir a hreh lo. Nipui lai khan Manchester United leh Arsenal ten duh mah se Atletico hian pound maktaduai 51 aia tlawma chhuah an phal lo a, tunah erawh a man a tlahniam ta hle.

Magpies manager Eddie Howe hian Burnley manager a nih laiin kum 2011 khan Trippier hi a lo lalut tawh a, an inhriatchian sa avangin thawhhonaah buaina tur a awm lo.

Saudi Arabia aṭanga sum an neih hnuah Magpies tan Trippier hi an player lakluh hmasa ber a ni dawn a, player dang pathum lakluh an la tum bawk.

Tun dinhmunah chuan Burnley centre-back James Tarkowski hming a ri ring viau a, coach Howe chuan ani bakah hian central midfielder leh forward pakhat lak belh a duh bawk a ni.