A chiang tawh kha a chiang leh lo!

Novak Djokovic dinhmun chiang lo reng kha Thawhlehni tlaiah tih chian a ni a, chu chu 'Australian Open a khel dawn' tih a ni. Mahse, nimin tlaia thu thar berah chuan world number 1 hi thawn kir leh theih dinhmunah a ding!

Australian Open khel tur chuan Covid-19 laka invenna an lak ngei a ngai, an la lo a nih chuan hriselna lam thil vanga lak loh chhanah ngaihhnathiamna an neih a ngai, hei hi expert independent panel lamin an pawmpui a ngai bawk.

Serbian star hian vaccine la lo mah se Australia ramah zin luhtir a ni. Hei hian Australian mipui tam tak a ti thinur a, mipui 90% zetin vaccine an lak tawh avangin ram dang mi ngaihhnathiamna an pe mai hi an sawisel nasa hle.

Australian prime minister Scott Morrison chuan, "Novak Djokovic hian hriselna thil vanga vaccine a lak loh chhan tih chianna a nei ngei tur a ni a, a nei lo a nih chuan a lo kalna lamah a kir lehnghal ang, a tan a hrana dan leh hrai siam bik a ni dawn lo," a ti.

Novak a zin
Thawhlehni tlai khawn tennis khawvel chuan thu thar lian tak a nei - chu chu Djokovic-a'n Australian Open a khelh tur thu a ni. Serbian star hian vaccine a lak thu puan a la ni lo chunga inelna a hmachhawn tur hian zawhna a ti tam.

Australian Open chief Craig Tiley chuan, "A bik taka ruahman a awm hran lo," tiin Djokovic chungchang a sawi a, vaccine la lo player 26 dang pawhin ngaihhnathiamna an dil thu a sawi tel bawk a, midang hi an phalsak em, tih erawh sawi lan a ni lo thung.

Sydney khawpuia khelh ATP Cup aṭang pawhin Djokovic hi a lo inhnukdawk tawh a, inelna lian erawh hmachhawn ngei a duh avangin a tih dan kawng a dap viau tih a chiang - Tennis Australia pawhin kawng an dapsak tih a hriat theih bawk.

BBC tennis commentator Andrew Castle chuan, "Novak hi Australian Open nen a inzawm tlat a, a tel lo chuan Melbourne Park-a inelna hian a hlutna a hloh ang, a inlan avang hian midang hriselna engmah a khawih pawi loh ka beisei," tiin a sawi.

World number 1 Djokovic hian Australian Open nomawi hi vawi kua a chawi tawh. Kuminah hian a champion leh a nih chuan Grand Slam nomawi chawi hnem lamah Roger Federer (20 titles) leh Rafael Nadal te a khum thei dawn.

An sawisel
Hripui len tirh aṭangin Australia sorkar hi a kal fawr berte zinga mi an ni. Tennis chauh ni loin infiamna peng danga player-te chungah pawh inkaihhruaina khauh tak tak a lo chhuah tawh, tun ṭuma vaccine lak ngei a ngai an ti pawh hi a mak hran lo.

Infiammi chauh pawh ni loin mipui chu khuahkhirhna hnuaiah an awm, an nun a zalen rih lo hle. An duh duhna hmuna zin vei vah phal a nih loh avang hian chhungkua inhmukhawm thei lo pawh an tam viau nia sawi a ni.

Australian sports journalist Andrew Maher chuan, "Australian mipuite chu kum hnih chhung thunun kan ni tawh, coronavirus lakah hian tumah mi pawimawh bik a awm theih loh. Novak Djokovic hi player ropui a ni, mahse hripui laka thil pawimawh a ni lo," tiin a sawisel.

Australia rama infiammi langsar pakhat Corey McKeran pawhin sawiselin, "Kan hmangaih ṭhenkhatte chu hri vangin an thi mek, ṭhenkhat chuan enkawlna an mamawh mek bawk. Mahni duhna hmunah ngei pawh inenkawl theih a ni si lo.

"Kei ngei pawh hri ka kai avangin Victoria-ah ka awm a, ka chhungte chu Queensland-ah an awm thung, kan inkal pawh a rem lo. Inkaihhruaina dan siam chawp lem leh laktlak loh a ni, harh a hun e," tiin a sawi.

An hnawl bik si
Rorelna a lai tawk lo tia sawiseltu an tam a, a tuartu zingah Indian rawlthar Aman Dahiya a tel - ani hi chuan coronavirus laka invenna vaccine a la lak loh avangin Australian Open 2022 hi a khel ve thei dawn lo.

Kum 17 mi Aman hian junior championship khel turin qualifying a paltlang. Mahse, India ramah kum 18 hnuai lam tan vaccine an pe chhuak ṭan chauh a, ani pawh hian vaccine a la ve hman lo a ni.

Ngaihhnathiamna an dilsak a, mahse Aman tana dilna hi an hnawl. Aman-a coach Jignesh Rawal chuan Australian Open buatsaihtu leh Victoria state sorkar chu na takin a sawisel a, a player inlan thei lo tur chu pawi a ti hle.

Rawal chuan, "Dan ang chuan vaccine lak a ngai, mahse eng vangin nge vaccine la lo Djokovic a kal theih bik? Aman tana hun ṭha inher chhuak an tihtawpsak bik hi chu hriatthiam a harsa takzet a ni.

"Chhungkaw harsa tak aṭanga seilian a ni a, a pa in thla khatah Rs 10,000 chauh a hlawh. Australian Open khel thei ni se la chuan midang tan pawh beiseina a siamsak ang," tiin Indian Tennis Federation hnuaia nomawi 15 chawi tawh rawlthar thlavang a hauh.