Ranji Trophy khelh hun an sawn

Hripui len lai a nih miau avangin thil chiang a awm hleithei lo. Board of Control for Cricket in India (BCCI) chuan Ranji Trophy, Col C K Nayudu Trophy leh Senior Women’s T20 League chu a hun pangngaiah khelh theih a nih dawn loh thu an sawi.

Tun hnai khan BCCI president Sourav Ganguly chuan inelna hi hripui leng karah a hun pangngaia khelh a nih tur thu a sawi. Mahse, Ganguly thusawi hnu lawkah BCCI chuan thudang a nei leh ta zawk.

Season hmasa khan coronavirus vang hian Ranji Trophy chu khelh theih a ni lo, kuminah hian inkhungbingna hnuaiah khelh ngei an tum ruh hle. Mahse, player leh hnathawktu lam hriselna ngaihtuah chungin BCCI-in thutlukna a siam a ngai.

India ram cricket thuneitu sang ber BCCI chuan thuchhuah siamin, "Board of Control for Cricket in India (BCCI) chuan ram chhunga Covid-19 darh zel dan ngun takin a ngaihtuah a, loh theih lohin kan kalphung thlak danglam a ngai dawn.

Tun thlaa khelh tur Ranji Trophy leh Col C K Nayudu Trophy bakah February thlaa khelh tur Senior Women’s T20 League te chu a hunah kan khel thei dawn lo. BCCI chuan player-te hriselna a ngai pawimawh a, inelna neih leh hun tur chu a hrana inhriattir leh a ni ang," an ti.

BCCI hnuaiah hian 2021-22 season chhungin state leh state inelna chi hrang 11 awm tura tih a ni a, match 700 chuang khelh a ni dawn. Mahse, tunah chuan hripui vang hian match engzat nge an khelh theih dawn tih hriat theih a ni ta lo.

Inelna hmachhawn tur hian Cricket Association of Mizoram pawh a inbuatsaih ngawrh hle. Mizoram hi plate group-ah Mizoram hi plate group-ah Chandigarh, Nagaland, Sikkim, Arunachal Pradesh leh Meghalaya te nen an awm.