Hri leng vangin I League an chawl rih

India rama club football inelna ngaihhlut hlawh tak I League chu Covid-19 hri hluar zel avangin chawlh rih a ni a, AIFF League Committee chuan inelna hi kar ruk tal chawl rih turin thutlukna a siam a ni.

Hri leng vangin I League hi Kolkata khawpuiah khelh a ni a, hri laka him theih nan player leh staff te pawh hotel-ah khung hran vek an ni - mahse, heti chung hian hriin a luhchilh ta tho.

Kar hmasa khan I League player aṭangin mi pariatin hri an kai tih hmuhchhuah a ni a, hei vang hian league hi chawlh lailawk a lo ni tawh. Thawhṭanni zan khan video conferencing hmangin League Committee an ṭhukhawm zui a, I League chu kar ruk tal chawl rih mai turin an rel ta a ni.

League Committee-ah hian MFA honorary secretary Lalnghinglova Hmar a tel a, AIFF senior vice president Subrata Dutta chuan committee hi kaihruaiin Reliance aiawh Chirag Tanna, Football Sports Development Limited (FSDL) senior manager Rochak Langer, AIFF general secretary Kushal Das, League CEO Sunando Dhar, COO Swati Kothari leh AIFF director (Legal Affairs & International Relations) te an tel bawk.

Hri darh dan
Kar hmasa khan I League club player pariat leh official pathumin hri an kai tih hmuhchhuah a ni a, heng zinga player panga leh official pathum chu Real Kashmir club amite an ni.

Mizo club Aizawl FC, Mohammedan Sporting leh Sreenidi Deccan FC ten hri kai pakhat ṭheuh an nei bawk a, league pawh chawlh lailawk a ni nghal.

League lamin nghak det mah se, hri a darh nasa hman a, Vanglaini thudawn danin I League club aṭangin mi 45 ngawtin hri an kai - hei vang hian league chu khelh chhunzawm zel chiah an ngai lo.

AIFF sports medical committee member zinga mi Dr. Harsh Mahajan chuan inelna hi kalpui zel chiah a ngaih loh thu a sawi a, a thurawn angin thutlukna siam a ni ta a ni.

Nghak det ang!
Tun season I League-ah club 13-in inelna an hmachhawn a, league chawl rih tura thutlukna siam a nih hma hian club-te ngaihdan pawh lak a ni a, an vaiin league chawlh rih hi an thlawp vek a ni.

Dr. Mahajan chuan, "Omicron hri hi a darh chak em em a, chutihrual chuan a reh hma bawk. Hei bakah hian kan league khelhnaa sorkar ngaihdan leh duhdante thlir tel a ngai ve bawk a ni," a ti.

AIFF League Committee hi kar li hnuah an ṭhukhawm leh dawn a, chawlh chhunga club tinte dinhmun an thlir ang a, hetih huna dinhmun a zirin league kal zel dan tur pawh ngaihtuah ṭhat leh a ni dawn a ni.

Player leh staff te chu nimin khan hri an kai leh kai loh test neih leh vek a ni a, an negative chuan January 7 hnuah hotel chhuahsanin an duhna lam an pan thei ang. Positive te erawh West Bengal sorkar inkaihhruaina dan zawmin an inkhunghrang ang a, an negative hunah chhuah phalsak an ni ang.

League dinhmun
I League-ah Mizo club Aizawl FC pawh an inlan a, Indian coach ṭhangduang Yan Law enkawlna hnuaia khel team hian match khat an khel hman a, Real Kashmir lakah 3-2 in an tlawm.

Aizawl FC-in point an nei hman lo tihna a ni a, tun season I League-ah club tinin match khat ṭheuh bak an khel hman lo a, inpuahchahna an neih dan thlirsak chuan match khat leka inelna chawlhsan rih a ngai nghal hi an khawngaihthlak hle.

I League hi Mohun Bagan Ground, Kalyani Stadium leh Naihati Stadium-ah te khelh a ni a, ruahman dan chuan December 26-a khelh ṭan inelna hi April-a khelh zawh tura tih a ni.

Mahse, hri leng vanga I League an chawlh takah chuan inelna hi April-ah an zo hmanin a rinawm loh a, khelh pawh an khel zo thei kher ang em, tih chu zawhna a ni mek.