James hoin Lakers an chak

LeBron James-a point 31 neih hmangin Los Angeles Lakers chuan Sacramento Kings 122-114 in an hneh a, tun hnaiah a zawnin match thum an chak ve ta - Inrinni zingah Atlanta Hawks nen an inkhel leh ang.

Inkhelh tawp hma minute riat chauh awm tawh Lakers hi 96-89 in an hniam zawk. Mahse, hun tawp dawn bikah hian James-a'n point 14 ngawt a nei a, point 11 neitu Malik Monk a chet ṭhat bawk avangin an lehthal.

NBA regular season kal laiah Lakers hian beisei an phak lo, vawi 19 ngawt an tlawm tawh - ṭum 20 an chak tling ve tawh thung. Western Conference table-ah pasarihna an ni mek a, playoff khel phak chinah awm mah se an dinhmun a him rih lo.

Nimin zing inkhel dangah Toronto Raptors chuan San Antonio Spurs chu 129-104 in an hneh. Toronto chak theih nan hian Fred VanVleet chuan point 33 a nei a, ani bakah hian Pascal Siakam-a'n point 18 a neih bakah rebound vawi 12 a la bawk.

NBA - Nimin Results
San Antonio Spurs 104 - 129 Toronto Raptors
Sacramento Kings 114 - 122 Los Angeles Lakers
Memphis Grizzlies 110 - 106 Cleveland Cavaliers
Indianna Pacers 94 - 104 New York Knicks
Phoenix Suns 123 - 110 New Orleans Pelicans