African Cup of Nations-in engtin nge Premier League a nghawng dawn

Africa rama football inelna sang ber 2021 Africa Cup of Nations chu January 9 - February 6, 2022 chhung hian Cameroon-ah khelh a ni dawn. Inelnaah hian ram 24 an tel dawn a, inelna hmachhawn tur Premier League player 30 chuang hret zingah player langsar an tel avangin result-ah nghawng lian tak a nei ang.

Premier League club zingah club pali Leeds United, Newcastle United, Norwich City leh Tottenham Hotspur te chauhin player an thawh lo a, club dang zawngin player pakhat tal an thawh vek.

Manchester an vannei
Manchester khaw club pahnih Manchester City leh Manchester United ten player pakhat ve ve an thawh a, vanduai zingah an vanneiah a ngaih theih. Man United-in defender Eric Bailly chauh an chhuah a, Ivorian defender hian league match li chauh a la khel. Ralf Rangnick-a hote hian hliam ngah mah se Phil Jones a dam leh tawh avangin Bailly awm lo hi an tuar hran lo ang.

Man City erawhin Rihad Mahrez an chan a, Algerian winger hi player pawimawh zinga mi a ni. Kum 30 mi Mahrez hian tun season-ah league match 16 khel tawhin goal ruk a khung a, Afcon laia an hmachhawn tur zingah Chelsea a tel.

Mendy tel loin Chelsea
Chelsea-in keeper Edouard Mendy chauh chan mah se Senegalese keeper hi team tana a pawimawh em avangin channa nasa tak a ni a, an vanduaina belhchhah turin Afcon laiin inkhel pawimawh an ngah.

Blues hian League Cup semifinal-ah Tottenham Hotspur an hmachhawn dawn a, league-ah Spurs bakah champion lai Manchester City nen an inkhel dawn a, Club World Cup an khel dawn bawk. Chutihrualin London club hian khawvel keeper manto ber Kepa Arrizabalaga an la kawl tih hriat a ṭha.

Gunners-in an tuar
Arsenal player pali ngawt Thomas Partey (Ghana), Pierre-Emerick Aubameyang (Gabon), Nicolas Pepe (Ivory Coast) leh Mohamed Elneny (Egypt) te an chan. A êng zawnga thlir chuan tun hnaiah Aubameyang leh Pepe ten hmun pawimawh an chang pha lo a, an tawrh dan a ziaawm ang.

Chutihrualin midfield lai luahlumtu Partey awm lo tur erawh a hmunruak hnawh khah a awlsam dawn lo. Gunners hian League Cup semifinal-ah Liverpool an hmachhawn dawn a, North London Derby-in a la hmuak bawk.

A tuar ber Liverpool
Liverpool-in player pathum Mohamed Salah (Egypt), Sadio Mane (Senegal) leh Naby Keita (Guinea) te an chan dawn a, Salah leh Mane tel loa inkhelh an zir rih a ṭul dawn.

Salah hian tun season league match vawi 20-ah goal 16 ngawt a khung a, a goal khung pawimawhna leh khelmual chhunga a ṭangkai dan thlir phei chuan a hmunruak hi luah khat theih loah a ngaih theih.

Mane hian Salah tluk pha lo mah se league match 20-ah goal riat khung thei a ni. Senegalese forward hi Liverpool tlarhmaah Salah hnaih bertuah a ngaih theih a, thlak an harsa dawn.

Jurgen Klopp-a'n tlarhmaah Salah, Mane leh Diogo Jota a hmang ṭhin a, Roberto Firmino pawh Covid-19 vangin a inkhung mek. Tunah chuan Jota, Divock Origi leh Takumi Minamino te tlarhmaah an awm a ṭul dawn a, an inthlau ta hle.